ភ្នំពេញ៖ កម្ពុជា-ម៉ារ៉ុក ប្តេជ្ញាចិត្តពង្រឹងបន្ថែមទៀតនូវទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យផ្សេងៗទៀត ដែលជាប្រយោជន៍រួមនៃប្រទេសទាំងពីរ។ នេះបើតាមការចុះផ្សាយរបស់ ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី៩​ ខែកុម្ភៈ ឆ្នាំ២០២៦។

ក្នុងឱកាស ឯកឧត្តម ចាយ ណាវុធ អនុរដ្ឋលេខាធិការក្រសួងការបរទេស ជួបពិភាក្សាការងារទ្វេភាគីជាមួយ ឯកឧត្តម Omar KADIRI ប្រធាននាយកកិច្ចការអាស៊ី និងអូសេអានី នៃក្រសួងការបរទេស សហប្រតិបត្តិការអាហ្វ្រិក និងជនអន្តោប្រវេសន៍ម៉ារ៉ុក នៅទីក្រុងរ៉ាបាត ព្រះរាជាណាចក្រម៉ារ៉ុក ភាគីទាំងពីរ បានពិភាក្សាអំពីការរៀបចំកិច្ចប្រជុំពិគ្រោះ យោបល់ទ្វេភាគីលើកទី៥ រវាងក្រសួងការបរទេសទាំងពីរ ដែលនឹងប្រព្រឹត្តទៅនៅទីក្រុងរ៉ាបាត ប្រទេសម៉ារ៉ុក ក្នុងឆ្នាំ២០២៦ នេះផងដែរ។

លើសពីនេះ ភាគីទាំងពីរ បានស្វាគមន៍ចំពោះវឌ្ឍនភាពនៃទំនាក់ទំនងកម្ពុជា-ម៉ារ៉ុក និងបានរំលឹកឡើងវិញនូវកិច្ចប្រជុំប្រកបដោយផ្លែផ្កា នៅថ្ងៃទី២១ ខែតុលា ឆ្នាំ២០២៥ តាមប្រព័ន្ធវីដេអូ រវាងឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងឯកឧត្តម ណាសឺរ ប៊ូរីតា រដ្ឋមន្ត្រីក្រសួងការបរទេសម៉ារ៉ុក ពិសេសការចុះហត្ថលេខា លើសេចក្តីថ្លែងការណ៍រួម ដែលជាផែនទីបង្ហាញផ្លូវច្បាស់លាស់ សម្រាប់ការពង្រឹងកិច្ចសហប្រតិបត្តិការបន្ថែមទៀត រវាងប្រទេសទាំងពីរ៕