ភ្នំពេញ៖ «ដានជើងឌីជីថល» គឺជាសំណល់សកម្មភាពដែលយើងបានប្រើប្រាស់នៅលើអនឡាញ រួមមានសកម្មភាពដោយចេតនា និងទិន្នន័យផ្ទាល់ខ្លួនរបស់យើងនៅលើអ៊ីនធឺណិត។ ខាងក្រោមនេះ គឺជាវិធីបង្កើនសុវត្ថិភាព តាមរយៈការកាត់បន្ថយដានជើងឌីជីថល៖

១. ត្រូវពិចារណាឱ្យបានច្បាស់លាស់រៀងរាល់ពេលបង្ហោះ ឬចែករំលែកអ្វីមួយនៅលើអនឡាញ, លុបគណនីអ៊ីម៉ែលចាស់ៗ និងគណនីបណ្តាញទំនាក់ទំនងសង្គមដែលអ្នកឈប់ប្រើ, បង្កើតអ៊ីម៉ែល ឬគណនីបណ្តាញទំនាក់ទំនងសង្គមតាមការចាំបាច់ប៉ុណ្ណោះ។ ២. កំណត់បុគ្គល ដែលអាចមើលឃើញសកម្មភាពរបស់អ្នក នៅលើបណ្តាញទំនាក់ទំនងសង្គម ដូចជាការ Lock Account នៅលើ Facebook ឬ Private Account នៅលើ Instagram ជាដើម។

៣. ក្នុងករណីបំពេញបែបបទ ឬចូលរួមការស្ទង់មតិនៅលើអនឡាញ សូមផ្តល់ព័ត៌មានដែលចាំបាច់ប៉ុណ្ណោះ ជាទូទៅគឺតែងតែមកជាមួយនឹងសញ្ញា (*), ជៀសវាងការផ្តល់ព័ត៍មានលើសពីតម្រូវការ, ប្រើប្រាស់មុខងារឯកជនភាព (Private Mode) នៅក្នុងកម្មវិធីរុករក ដើម្បីការពារកុំឱ្យកម្មវិធីកត់ត្រាសកម្មភាពរបស់អ្នក។ ចំពោះកម្មវិធីផ្សេងគ្នា ក៏អាចនឹងប្រើប្រាស់ឈ្មោះមុខងារនេះផ្សេងគ្នា ដូចជា Private Browsing, Incognito ឬ InPrivate ជាដើម។ ៤. ប្រើប្រាស់ VPN ដែលអាចទុកចិត្តបាន នៅពេលដែលអ្នកធ្វើការងារសំខាន់ ឬសម្ងាត់ ក៏ដូចជាពេលប្រើប្រាស់ WiFi សាធារណៈជាដើម។

បើតាមគេហទំព័រកម្ពុជាឆ្ពោះទៅឌីជីថល សកម្មភាពដែលចាត់ទុកថា ជា «ដានជើងឌីជីថល» មានដូចជាការទិញទំនិញអនឡាញ សកម្មភាពនៅលើបណ្តាញទំនាក់ទំនងសង្គម និងប្រវត្តិការស្វែងរកជាដើម។ ការយល់ដឹងពីដានជើងឌីជីថល គឺជារឿងសំខាន់ ព្រោះសកម្មភាពអនឡាញរបស់អ្នក បង្ហាញពីអ្វីដែលជាខ្លួនអ្នក ខណៈដែលទិន្នន័យនេះ ក៏អាចត្រូវបានយកទៅប្រើប្រាស់ សម្រាប់សកម្មភាពផ្សេងៗ ដូចជាការកំណត់គោលដៅផ្សព្វផ្សាយពាណិជ្ជកម្មជាដើម៕