ភ្នំពេញ៖ សម្តេចធិបតី ហ៊ុន ម៉ាណែត សម្រេចកំណត់យកថ្ងៃទី២៧ ខែមិថុនា ជា«ទិវាជាតិសហគ្រាសធុនមីក្រូ តូច និងមធ្យម» ជារៀងរាល់ឆ្នាំ ដើម្បីលើកកម្ពស់និងផ្តល់តម្លៃដល់វិស័យសហគ្រាសនៅកម្ពុជា។ នេះបើតាមអនុក្រឹត្យស្តីពីទិវាជាតិសហគ្រាសធុនមីក្រូ តូច និងមធ្យម ដែលសម្តេចធិបតីនាយករដ្ឋមន្រ្តីកម្ពុជា បានសម្រេច កាលពីថ្ងៃទី២៩ ខែមករា ឆ្នាំ២០២៤។

អនុក្រឹត្យដដែល បានបញ្ជាក់ថា ទិវាជាតិសហគ្រាសធុនមីក្រូ តូច និងមធ្យម នឹងជួយបង្កើតការងារ ជំរុញការផ្គត់ផ្គង់ខ្សែច្រវ៉ាក់ផលិតកម្ម និងពង្រីកទីផ្សារក្នុងស្រុក និងអន្តរជាតិ។ ទិវានេះ នឹងរៀបចំដោយក្រសួងឧស្សាហកម្ម វិទ្យាសាស្ត្រ និងនវានុវត្តន៍ ដែលសហការជាមួយក្រសួង ស្ថាប័ន រដ្ឋបាលថ្នាក់ក្រោមជាតិ សហគ្រាសសាធារណៈ សហគ្រាសឯកជន សមាគម សហគមន៍ គ្រឹះស្ថានសិក្សា និងភាគីពាក់ព័ន្ធ។

ក្នុងអនុក្រឹត្យរបស់សម្តេច ហ៊ុន ម៉ាណែត បានសង្កត់ធ្ងន់ថា «គ្រប់ក្រសួង ស្ថាប័ន រដ្ឋបាលថ្នាក់ក្រោមជាតិ សហគ្រាសសាធារណៈ សហគ្រាសឯកជន សមាគម សហគមន៍ គ្រឹះស្ថានសិក្សានានា និងភាគីពាក់ព័ន្ធ ត្រូវចូលរួមបំផុសស្មារតីគាំទ្រទិវាជាតិនេះ និងសហការរៀបចំការតាំងបង្ហាញនូវផលិតផល ដែលជាស្នាដៃរបស់ផលិតករ សេវាករ អាជីវករ និងសិប្បករក្នុងស្រុក»៕