ភ្នំពេញ៖ «ថៃខ្លាចអន់ ឬក៏ច្រឡំថាជាតិសាសន៍គេល្ងង់ជាងខ្លួន?»។ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចោទសួរភាគីថៃដូច្នេះ ក្រោយរដ្ឋាភិបាល កងទ័ព និងក្រុមថៃប្រឆាំងថៃ ធ្វើសកម្មភាពបង្វែរសាច់រឿង បំភ័ន្តសាធារណមតិថៃខ្លួនឯង និងសហគមន៍អន្តរជាតិជាបន្តបន្ទាប់ ដើម្បីសម្រាលអំពើស្មោកគ្រោក ដែលបង្កនៅតំបន់មុំ៣ បន្លប់រឿងនយោបាយបែកបាក់ផ្ទៃ និងបិទបាំងដំណើរលើថ្មមាត់ជ្រោះនៃរាជរដ្ឋាភិបាល បច្ចុប្បន្ន។

គិតត្រឹមសភាពការណ៍ នៅថ្ងៃទី២៥ ខែមិថុនានេះ ឯកឧត្ដមអភិសន្តិបណ្ឌិត ស សុខា ថា៖ «ថៃចេញមុខសម្ដែងដើរតួកំសត់ ឱ្យជនជាតិថៃ និងសហគមន៍អន្តរជាតិ ជឿថា ថៃបើកច្រកព្រំដែនអស់ហើយ នៅឡើយតែខ្មែរទេតើ ដែលបន្តបិទ ផ្ទុយពីជំហរថៃ។ ចំពោះសហគមន៍អន្តរជាតិ ជាទូទៅ ក៏ប្រហែលជាផ្ដើមជ្រេញដែរ ដ្បិតពួកគេក៏តាមមិនទាន់ក្បួនល្បិចបែបកូនក្មេងរបស់ថៃដែរ»។

បើតាម ឯកឧត្ដមអភិសន្តិបណ្ឌិត ស សុខា ថៃបើកតែទ្វារច្រក តែមិនឱ្យមនុស្សឆ្លងកាត់ជាសាធារណៈ ហើយទង្វើបែបនេះ កាន់តែជាកំណត់ត្រាបញ្ចូលក្នុងសំណុំរឿងថ្កោលទោស និងដាក់បន្ទុកផ្លូវច្បាប់លើថៃទៅវិញ។ ឯកឧត្ដម ស សុខា បញ្ជាក់ថា បើថៃមានសុចរិតភាព និងបើកច្រកទាំងអស់ជាផ្លូវការដូចដើមទាំងស្រុងឡើងវិញ ដែលថៃបានបិទដោយឯកឯងនោះ ថៃត្រូវចេញលិខិតប្រកាសបើកជាចំហ ឬថ្លែងជាសាធារណៈដល់ភាគីកម្ពុជា និងពិភពលោកឱ្យដឹង។ «កុំបើកចំហរតែទ្វារដើម្បីបង្ហាញរូបភាព តែបិទមិនឱ្យមានការចេញចូលជាទូទៅនោះ នេះហៅថា បើកតែបិទ ក្នុងឧបាយកលពិសពុល»។ នេះជាប្រសាសន៍របស់ ឯកឧត្ដម ស សុខា។

សម្រាប់ ឯកឧត្ដមរដ្ឋមន្ត្រីក្រសួងមហាផ្ទៃ ខ្មែរក្រជាងថៃ តែខ្មែរថ្លៃថ្នូរជាងថៃ, ថៃមិនស្គាល់សង្គ្រាម តែខ្មែរឆ្អែតនឹងសង្គ្រាម, ថៃមានបាន ខ្មែរជួយអរ ហើយខ្មែរត្រូវការតែការគោរព និងសហប្រតិបត្តិការដោយស្មើភាពតាមយន្តការច្បាប់ កិច្ចព្រមព្រៀង និងយន្តការអន្តរជាតិ៕