ភ្នំពេញ៖ ក្នុងឆ្នាំ២០២៤ ប្រាក់ចំណូលមធ្យមរបស់ប្រជាពលរដ្ឋខ្មែរម្នាក់ៗ នឹងមានចំនួន ២ ០៧១ដុល្លារ កើនជាង ៨% បើធៀបទៅនឹងឆ្នាំ២០២៣ ដែលមាន ១ ៩១៧ដុល្លារ។ បើតាមរបាយការណ៍ថវិកាសង្ខេបឆ្នាំ២០២៤ សេដ្ឋកិច្ចកម្ពុជាឆ្នាំ២០២៤នេះ ត្រូវបានព្យាករថា នឹងសម្រេចបានកំណើនក្នុងរង្វង់ ៦,៦% ដែលជាហេតុធ្វើឱ្យប្រាក់ចំណូលជាមធ្យមពលរដ្ឋខ្មែរកើនឡើង។

សេដ្ឋកិច្ចកម្ពុជា នឹងសម្រេចបានកំណើនក្នុងរង្វង់ ៦,៦% នេះ ត្រូវបានក្រសួងសេដ្ឋកិច្ចព្យាករថា នឹងធ្វើឱ្យផលិតផលក្នុងស្រុកសរុប (ផ.ស.ស) នាពេលបច្ចុប្បន្ន ស្ថិតនៅក្នុងរង្វង់ ១៤២ ៩៥៧ពាន់លានរៀល ស្មើនឹងប្រមាណ ៣៥ ១៦៨លានដុល្លារអាម៉េរិក ស្របពេលដែល ផ.ស.ស សម្រាប់មនុស្សម្នាក់ៗរំពឹងកើនដល់ ២ ០៧១ដុល្លារ។

តាមការព្យាករណ៍ក្នុងរបាយការណ៍ដដែល កំណើនសេដ្ឋកិច្ចកម្ពុជាក្នុងឆ្នាំ២០២៤ ត្រូវបានទ្រទ្រង់ដោយវិស័យចំនួន៣ រួមមាន៖ ទី១. វិស័យឧស្សាហកម្ម ត្រូវបានគេព្យាករថា នឹងបន្តនិន្នាការកើនឡើងក្នុងរង្វង់៨,៥% ខណៈឆ្នាំ២០២៣ មានប្រមាណ ៥% ដោយសារការរំពឹងទុក នៃការងើបឡើងវិញ នៃអនុវិស័យកាត់ដេរ ស្របពេលដែលអនុវិស័យកម្មន្តសាលមិនមែនកាត់ដេរនៅបន្តរក្សាបានកំណើនរឹងមាំ ខណៈដែលអនុវិស័យសំណង់នៅបន្តមានកំណើនទាប។

ទី២. វិស័យសេវាកម្ម ត្រូវបានព្យាករថា នឹងបន្តនិន្នាការក្នុងអត្រាកំណើន ៦,៩% ដែលឆ្នាំ២០២៣ មានកំណើនរង្វង់៨,១% ។ ការរំពឹងបែបនេះ ព្រោះការបន្តងើបឡើងវិញ នៃសកម្មភាពសេដ្ឋកិច្ចក្នុងស្រុក ជាពិសេសអនុវិស័យសណ្ឋាគារ និងភោជនីយដ្ឋាន ដែលនាំឱ្យមានផលវិជ្ជមានដល់វិស័យ-អនុវិស័យគាំទ្រផ្សេងៗទៀតដូចជា អនុវិស័យលក់ដុំ-រាយ និងដឹកជញ្ជូនជាដើម។

ទី៣. វិស័យកសិកម្ម ត្រូវបានរំពឹងថា នឹងសម្រេចបានកំណើនក្នុងរង្វង់ ១,១% នៅឆ្នាំ ២០២៤ ធៀបនឹង ០,៩% ក្នុងឆ្នាំ២០២៣ ដោយសារការបន្តនិន្នាការល្អនៃអនុវិស័យដំណាំ និងការងើបឡើងវិញនៃអនុវិស័យនេសាទ ខណៈដែលអនុវិស័យចិញ្ចឹមសត្វនៅបន្តមានស្ថិរភាព៕