ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ ជំរុញឱ្យម្ចាស់ក្រុមហ៊ុន វិនិយោគិនកូរ៉េ មកបណ្តាក់ទុនវិនិយោគនៅកម្ពុជាបន្ថែមទៀត ស្របពេលដែលកម្ពុជា មានច្បាប់អនុគ្រោះលើការវិនិយោគ។ ឯកឧត្តមអភិបាលរាជធានីភ្នំពេញ លើឡើងដូច្នេះក្នុងជំនួបជាមួយ ឯកឧត្តម គីម យ៉ុងរុក អភិបាលខេត្ត Jeollannam-do នៃប្រទេសកូរ៉េ កាលពីថ្ងៃទី១២ ខែមិថុនា ឆ្នាំ២០២៥។

ក្នុងជំនួបដដែលនោះ ឯកឧត្តម ឃួង ស្រេង បានអរគុណដល់កូរ៉េ ដែលបានទទួលយកពលករកម្ពុជា ទៅធ្វើការជាង ៤,៦ម៉ឺននាក់។ ឯកឧត្តមឃួង ស្រេង គូសបញ្ជាក់ថា ឯកឧត្តម បានស្នើសុំទៅរាជរដ្ឋាភិបាលកម្ពុជា ក្នុងការចងសម្ពន្ធ័មេត្រីភាពរវាងរាជធានីភ្នំពេញ និងខេត្ត Jeollanam do ផ្តោតលើទីក្រុងចំនួន ៣ របស់កូរ៉េ ដើម្បីពង្រឹងកិច្ចសហប្រតិបត្តិការរវាងទីក្រុង នៃប្រទេសទាំងពីរបន្ថែមទៀត។ ឯកឧត្តមអភិបាលរាជធានីភ្នំពេញ ក៏បានលើកឡើងពីការរីកចម្រើនរបស់រាជធានីភ្នំពេញ ដែលកំពុងមានការអភិវឌ្ឍន៏លើគ្រប់វិស័យផងដែរ។

ឯកឧត្តម គីម យ៉ុងរុក បានកោតសរសើរអំពីការរីកចម្រើនរបស់រាជធានីភ្នំពេញ ដែលកំពុងមានការអភិវឌ្ឍ លើគ្រប់វិស័យ ដោយទទួលបានការកោតសរសើរ និងអបអរសាទរពីកំរិតជាតិ និងអន្តរជាតិ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ នេះបើតាមការចុះផ្សារបស់ ក្រសួងមហាផ្ទៃ នាថ្ងៃទី១៣ ខែមិថុនា ឆ្នាំ២០២៥៕