ភ្នំពេញ៖ រយៈពេល ៥ខែ ក្នុងឆ្នាំ២០២៥ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញមានចំនួន ២០៦ ០៥៥ទូ (TEUs) មានការកើនឡើងចំនួន ២៨,៧៥% បើធៀបនឹងរយៈពេលដូចគ្នានៅឆ្នាំ២០២៤ ដែលមានចំនួនកុងតឺន័រ ១៦០ ០៣៨ ទូ។ នេះបើតាមការចុះផ្សាយរបស់កំពង់ផែស្វយ័តភ្នំពេញ កាលពីថ្ងៃទី១២ ខែមិថុនា ឆ្នាំ២០២៥។

កំពង់ផែស្វយ័តភ្នំពេញ បានឱ្យដឹងថា ក្នុងរយៈពេល ៤ខែនេះ បរិមាណនាវា ដែលបានដឹកអ្នកដំណើរចូលចតចំណតផែ មានចំនួន ១៨៤គ្រឿង កើនឡើង ៣,៩៥% ដែលក្នុងនោះ មានអ្នកដំណើរដែលបានឆ្លងកាត់ចំនួន ១៩ ៦៩៥នាក់ កើនឡើង ៩,៨១% ធៀបនឹងរយៈពេល៥ខែក្នុងឆ្នាំ២០២៤។

ចំពោះ បរិមាណទំនិញ-ប្រេងឥន្ធនៈ ដែលបានឆ្លងកាត់កំពង់ផែស្វយ័តភ្នំពេញវិញ មានចំនួន ២ ១៧៤ ៨៦៤តោន កើនឡើងបាន ២១,៣៣% បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានចំនួន ១ ៧៩២ ៥៤៧តោន។ គួរបញ្ជាក់ថា លទ្ធផលការងារអាជីវកម្ម សេវាកម្ម ដែលកំពង់ផែស្វយ័តភ្នំពេញអនុវត្តក្នុងរយៈពេល ៥ខែ គឺពុំទាន់ធ្វើសវនកម្មទេ៕