ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ និងអង្គការសហប្រតិបត្តិការព្រៃឈើអាស៊ី (AFoCO) ឯកភាពពង្រឹងកិច្ចសហប្រតិបត្តិការ និងគ្រោងចុះអនុស្សរណៈនៃការយោគយល់គ្នា (MoU) ដើម្បីរៀបចំ និងអនុវត្តឥណទានកាបូនពីព្រៃឈើ ដាំស្តារព្រៃឈើ និងគ្រប់គ្រងបង្ការបញ្ហាភ្លើងឆេះព្រៃ ដើម្បីថែរក្សាព្រៃឱ្យបានល្អ និងមាននិរន្តរភាពយូរអង្វែង។

ក្នុងកិច្ចពិភាក្សា កាលពីថ្ងៃទី១០ ខែមិថុនា ឆ្នាំ២០២៥ ជាមួយលោកបណ្ឌិត Park Chongho នាយកប្រតិបត្តិនៃអង្គការ AFoCO ឯកឧត្តម កែវ អូម៉ាលីស្ស រដ្ឋលេខាធិការក្រសួងកសិកម្ម លើកឡើងពីកិច្ចពង្រឹងកិច្ចសហប្រតិបត្តិការរវាងរដ្ឋបាលព្រៃឈើ និងអង្គការសហប្រតិបត្តិការព្រៃឈើអាស៊ី ទាំងគម្រោងបានបញ្ចប់នាពេលកន្លងមក និងគម្រោងស្ថិតក្នុងការអនុវត្តន៍ នាពេលបច្ចុប្បន្ន។ ឯកឧត្តម កែវ អូម៉ាលីស្ស លើកទឹកចិត្តឱ្យសាធារណជន គាំទ្រចំពោះគម្រោងថ្មីៗបន្ថែមទៀតរបស់អង្គការ AFoCO ដែលផ្តោតទៅលើអនុវិស័យព្រៃឈើក្នុងប្រទេសកម្ពុជា។

កិច្ចពិភាក្សាខាងលើនេះ បានពិភាក្សាលើប្រធានបទចំនួន៤ រួមមាន៖ ១.គម្រោងរេដបូក (REDD+) សំដៅចូលរួមការពារ និងអភិរក្សព្រៃឈើ, ២. គម្រោងការទាញយកឥណទានកាបូនពីការធ្វើកសិ-រុក្ខកម្ម,៣.គម្រោងការដាំស្តារព្រៃឈើ និង៤. គម្រោងផ្តល់ជំនួយគាំទ្រផ្សេងៗសម្រាប់ជួយលើការស្រាវជ្រាវក្នុងអនុវិស័យព្រៃឈើ៕