ភ្នំពេញ៖ គិតត្រឹមចុងត្រីមាសទី១ ឆ្នាំ២០២៥ ទំហំមូលធនូបនីយកម្មទីផ្សារសរុប នៃទីផ្សារមូលបត្រកម្មសិទ្ធិ មានចំនួនប្រមាណ ២,៧៨ប៊ីលានដុល្លារ និងទំហំជួញដូរភាគហ៊ុនសរុបមានចំនួន ៦ ៤៩៥ ៨៧៤ ភាគហ៊ុន ដែលទំហំជួញដូរនៅក្នុងទីផ្សារគោលមានប្រហែល ៤៥,៧៩% និងទីផ្សារកំណើនមានចំនួនប្រហែល ៥៤,២១% នៃទំហំជួញដូរសរុប។ ចំពោះ ទីផ្សារមូលបត្របំណុល ពុំមានការជួញដូរលើសញ្ញាបណ្ណសាជីវកម្មណាមួយទេ។ នេះបើយោងតាមព្រឹត្តិបត្រទិន្នន័យជួញដូរមូលបត្រ ប្រចាំត្រីមាសទី១ ឆ្នាំ២០២៥។

បើធៀបនឹងត្រីមាសទី៤ ឆ្នាំ២០២៤ ទំហំជួញដូរផ្សារមូលបត្រកម្មមានសរុបប្រមាណ ២,៩៧លានភាគហ៊ុនបានថយចុះ ៣០,៦៧% និងតម្លៃប្រមាណ ៤,៣២លានដុល្លារ បានថយចុះ ២៩,១២%។ ជាមួយគ្នានេះ ទីផ្សារកំណើនទំហំមូលធនូបនីយកម្មទីផ្សារ មានចំនួនប្រមាណ ២៤,០១លានដុល្លារ ថយចុះ ៥,១៤%។ រីឯទំហំជួញដូរសរុបមានចំនួន ៣,៥២លានភាគហ៊ុន បានកើនឡើង ១ ៥០៨,៨៩% និងតម្លៃជួញដូរសរុបមានចំនួនប្រមាណ ១,៨០លានដុល្លារ បានកើនឡើង ១ ៤០៤,៣២% ។

នាពេលបច្ចុប្បន្ន ផ្សារមូលបត្រកម្ពុជា (CSX) មានផលិតផលចំនួនពីរប្រភេទ គឺមូលបត្រកម្មសិទ្ធិ (ភាគហ៊ុន) និងមូលបត្របំណុលដែលកំពុងត្រូវបានជួញដូរនៅលើទីផ្សារ។ ទីផ្សារមូលបត្រកម្មសិទ្ធិ មានក្រុមហ៊ុនចុះបញ្ជីសរុបចំនួន ១១ក្រុមហ៊ុន ដែលក្នុងនោះមានក្រុមហ៊ុនចំនួន៩ បានចុះបញ្ជីនៅទីផ្សារគោល និងក្រុមហ៊ុនចំនួន២ បានចុះបញ្ជីនៅទីផ្សារកំណើន។ រីឯទីផ្សារមូលបត្របំណុល មានក្រុមហ៊ុនចំនួន ១៣ បានបោះផ្សាយលក់មូលបត្របំណុល ក្នុងនោះមូលបត្របំណុលដែលកំពុងចុះបញ្ជីមានចំនួន ១៣ ហើយមានមូលបត្របំណុលចំនួន ៧បានដល់ឥណប្រតិទាន៕