ភ្នំពេញ៖ កម្ពុជា មានសន្និធិបំណុលក្នុងក្របខ័ណ្ឌការផ្តល់ឥណទានរបស់រដ្ឋសរុបចំនួន ២,៨៦ប៊ីលានដុល្លារ គិតត្រឹមត្រីមាសទី១ ឆ្នាំ២០២៥ និងការចុះកិច្ចព្រមព្រៀងផ្តល់ឥណទានថ្មីជាមួយឥណាយិកសរុបចំនួន ៥៣,៣៧លានដុល្លារ ថយចុះប្រមាណ៥៤% បើធៀបនឹងត្រីមាសទី១ ឆ្នាំ២០២៤។ នេះបើតាមព្រឹត្តិបត្រស្ថិតិបំណុលសាធារណៈកម្ពុជា ក្នុងត្រីមាសទី១ ឆ្នាំ២០២៥។

សម្រាប់ការដកសាច់ប្រាក់នៅក្នុងត្រីមាសទី១ ឆ្នាំ២០២៥ ឥណាយិក បានដកយកទៅប្រើប្រាស់ជាក់ស្តែងសរុបមានចំនួន ៦៤,៩២លានដុល្លារ ដែលចំនួននេះមានការថយចុះប្រមាណ៣៥% បើធៀបនឹងរយៈពេលដូចគ្នាកាលពីឆ្នាំមុន។ ចំពោះការប្រមូលសេវាបំណុលវិញ រាជរដ្ឋាភិបាល ទទួលបានចំនួន ៥០,១៩លានដុល្លារ ដោយក្នុងនោះប្រាក់ដើមមានចំនួន ៣៤,៩៣លានដុល្លារ និងការប្រាក់និងកម្រៃផ្សេងៗ ១៥,២៦លានដុល្លារ ពីឥណាយិកក្នុងវិស័យសាធារណៈ និងក្នុងវិស័យឯកជន ដែលមានកំណើនប្រមាណ ២៤%៕