ភ្នំពេញ៖ ក្រសួងពាណិជ្ជកម្ម និងដៃគូអភិវឌ្ឍន៍ ពិសេសជាមួយធនាគារពិភពលោកប្រចាំកម្ពុជា នឹងបង្កើតយន្តការសម្របសម្រួល ដើម្បីពង្រឹងវិស័យពាណិជ្ជកម្មនៅកម្ពុជា និងអនុវត្តគម្រោង/កម្មវិធីនានា ឱ្យកាន់តែមានប្រសិទ្ធិភាពខ្ពស់ សំដៅរួមចំណែកក្នុងការអភិវឌ្ឍវិស័យពាណិជ្ជកម្ម កសាងសមត្ថភាពពាណិជ្ជកម្ម និងជំរុញកំណើនសេដ្ឋកិច្ចនៅកម្ពុជា។

ក្នុងជំនួបជាមួយលោក លី សូដេត សេដ្ឋវិទូជាន់ខ្ពស់ទទួលបន្ទុកផ្នែកម៉ាក្រូសេដ្ឋកិច្ច ពាណិជ្ជកម្ម និងវិនិយោគ នៃធនាគារពិភពលោកប្រចាំកម្ពុជា ឯកឧត្តម អ៊ុំ កុសល អនុរដ្ឋលេខាធិការក្រសួងពាណិជ្ជកម្ម បានបញ្ជាក់ពីគោលបំណងសំខាន់ក្នុងការរៀបចំបង្កើតយន្តការសម្របសម្រួលជាមួយដៃគូអភិវឌ្ឍន៍ក្នុងវិស័យពាណិជ្ជកម្មនៅកម្ពុជា។

លើសពីនេះ ឯកឧត្តម អ៊ុំ កុសល បានស្នើសុំឱ្យមានការចូលរួមសហការពីធនាគារពិភពលោកប្រចាំកម្ពុជា ក្នុងដំណើរការអនុវត្តយន្តការសម្របសម្រួលរវាងដៃគូអភិវឌ្ឍន៍ ជាមួយក្រសួងពាណិជ្ជកម្មនេះឱ្យបានជោគជ័យ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី០៥ ខែមិថុនា ឆ្នាំ២០២៥៕