ភ្នំពេញ៖ ប្រធានគណៈមេធាវី និងក្រសួងដែនដី នគរូបនីយកម្ម និងសំណង់ ចុះអនុស្សរណៈយោគយល់គ្នា (MoU) ដើម្បីឱ្យមានវត្តមានមេធាវី ចូលរួមពិគ្រោះ និងផ្តល់យោបល់លើបទប្បញ្ញត្តិពាក់ព័ន្ធនឹងវិស័យដីធ្លី ក៏ដូចជាការបង្កើននូវកម្រិត នៃកិច្ចសហប្រតិបត្តិការ សំដៅរួមចំណែកក្នុងការអភិវឌ្ឍនីតិរដ្ឋ។

តាមរយៈ MoU ដែលធ្វើឡើងរវាង លោកមេធាវី សាំង វណ្ណៈ ប្រធានគណៈមេធាវី និងកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្ម និងសំណង់ នេះ ស្ថាប័នទាំងពីរ នឹងបង្កើតឱ្យមានកិច្ចសហប្រតិបត្តិការ ដូចជាការបញ្ចូលសមាសភាពមេធាវីក្នុងដំណើរការតាក់តែងច្បាប់ និងលិខិតបទដ្ឋានគតិយុត្តក្នុង វិស័យរៀបចំដែនដី នគរូបនីយកម្ម និងសំណង់ និងរៀបចំការផ្សព្វផ្សាយ និងការបណ្តុះបណ្តាលរួមគ្នាសម្រាប់មន្ត្រី និងមេធាវី ដើម្បីបង្កើនការយល់ដឹងអំពីច្បាប់ និងលិខិតបទដ្ឋានគតិយុត្តនៅក្នុងវិស័យជាសមត្ថកិច្ចរបស់ក្រសួង។

មេធាវី ក៏ចូលរួមក្នុងការពិគ្រោះយោបល់លើបញ្ហាប្រឈម និងការផ្តួចផ្តើមធ្វើការកែលម្អ ច្បាប់ និងលិខិតបទដ្ឋានគតិយុត្តដទៃទៀតផងដែរ។ អនុស្សារណៈនៃការយោគយល់នេះ គឺឆ្លើយតបទៅនឹងគោលនយោបាយដឹកនាំគណៈមេធាវីទាំង ៩ចំណុច ក្រោមចក្ខុវិស័យរួម គឺ «រួមគ្នាដើម្បីវិបុលភាពនៃវិជ្ជាជីវៈមេធាវី» របស់លោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា។ នេះបើតាមការចុះផ្សាយគណៈមេធាវី កាលពីថ្ងៃទី៥ ខែមេសា ឆ្នាំ២០២៥៕