ភ្នំពេញ៖ សុវត្ថិភាពឌីជីថល ដូចជាការភ្ជាប់ Wi-Fi សាធារណៈ និងការប្រើប្រាស់ USB port សម្រាប់សាកថ្មទូរសព្ទ គឺជារឿងដែលត្រូវយកចិត្តទុកដាក់ និងប្រុងប្រយ័ត្នខ្ពស់ នាឱកាសបុណ្យចូលឆ្នាំថ្មី។ ដើម្បីការពារសុវត្ថិភាពឌីជីថលរបស់លោកអ្នក សាធារណជន គួរអនុវត្តវិធានការដូចខាងក្រោម៖

ការប្រើប្រាស់ Wi-Fi សាធារណៈនៅតាមស្ថានីយ៍ ភោជនីយដ្ឋាន ឬកន្លែងសាធារណៈ អាចបង្កហានិភ័យខ្ពស់ ព្រោះបណ្តាញ Wi-Fi ទាំងនេះ អាចជាគោលដៅរបស់ពួក Hacker ដែលចង់លួចទិន្នន័យផ្ទាល់ខ្លួនរបស់អ្នកប្រើប្រាស់ ដូចជាលេខកូដធនាគារ ឬពាក្យសម្ងាត់។ ដូច្នេះដើម្បីការពារខ្លួន សាធារណជន គួរប្រើ VPN នៅពេលភ្ជាប់ Wi-Fi សាធារណៈ ឬបើអាចប្រើ Mobile Data ជំនួសវិញជាការប្រសើរ។ ការបិទ Wi-Fi នៅពេលមិនប្រើប្រាស់ ក៏ជាវិធានការមួយដ៏ល្អផងដែរ ដើម្បីជៀសវាងការភ្ជាប់ដោយចៃដន្យទៅបណ្តាញ ដែលមិនមានសុវត្ថិភាព។

ទន្ទឹមនឹងនេះ ការប្រើ USB port សាធារណៈ សម្រាប់សាកថ្មទូរសព្ទនៅតាមអាកាសយានដ្ឋាន ឬស្ថានីយ៍អាចនាំឱ្យមានហានិភ័យ នៃការលួចទិន្នន័យ ឬហៅថា «Juice Jacking» ព្រោះ USB port ទាំងនេះ អាចត្រូវបានគេបំពាក់ឧបករណ៍ ក្នុងគោលបំណងចម្លងទិន្នន័យ ឬបំផ្លាញទូរសព្ទរបស់អ្នក។ ក្នុងគោលដៅជៀសវាងបញ្ហាទាំងនេះ សាធារណជន គួរប្រើឆ្នាំងសាកផ្ទាល់ខ្លួន ឬ Power Bank និងពិចារណាប្រើ Data Blocker Cable ដែលរារាំងការផ្ទេរទិន្នន័យនៅពេលសាកថ្មផងដែរ៕