ភ្នំពេញ៖ ឯកឧត្តម ហឿន សំនៀង អគ្គលេខាធិការរងនៃអគ្គលេខាធិការដ្ឋាន នៃក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងថា កិច្ចសហការទ្វេភាគីកម្ពុជា-ចិន បានជំរុញដល់ការរីកចម្រើនយ៉ាងខ្លាំលើការវិនិយោគឯកជន ក្នុងនោះទុនវិនិយោគរបស់ចិននៅកម្ពុជា ចាប់ពីឆ្នាំ១៩៩០ មកទល់ដើមឆ្នាំ២០២៥ មានទំហំប្រមាណ ៣៦ពាន់លានដុល្លារ។ នេះបើតាមការចុះផ្សាយរបស់ CDC កាលពីថ្ងៃទី១០ ខែមេសា ឆ្នាំ២០២៥។

ក្នុងវេទិកាពិសេសស្តីពី «មិត្តភាពដែកថែបកម្ពុជា-ចិន ក្នុងយុគសម័យថ្មី៖ កិច្ចសហប្រតិបត្តិការឈ្នះ-ឈ្នះ និងវិបុលភាពរួម» ឯកឧត្តម ហឿន សំនៀង បានបន្តថា រយ:ពេល ៥ឆ្នាំ ចាប់តាំងពីឆ្នាំ ២០២១-២០២៥នេះ ប្រភពទុនវិនិយោគចិនបានឈរនៅលំដាប់លេខ១ ឬ ២ សម្រាប់ការវិនិយោគឯកជននៅកម្ពុជា ខណៈដែលឆ្នាំ២០២៤ នេះ ការវិនិយោគមកពីប្រទេសចិន ស្ថិតនៅលំដាប់លេខរៀងទី១ ដោយបានរួមចំណែកប្រមាណ ៣ ៤២៣ ៧៨១ ២៧៤ លានដុល្លារ ស្មើនឹង ៤៩.៨២% នៃទុនវិនិយោគសរុបនៅកម្ពុជា។

គួរបញ្ជាក់ថា កិច្ចសហប្រតិបត្តិការទ្វេភាគីលើកិច្ចការអភិវឌ្ឍ ក៏បានផ្តល់ផលប្រយោជន៍ដល់កម្ពុជាចាប់ពីឆ្នាំ១៩៩០ ដល់ដើមឆ្នាំ២០២៥ ចិនបានផ្តល់ជំនួយអភិវឌ្ឍន៍ផ្លូវការមកកម្ពុជាសរុបប្រមាណជិត ៦ពាន់ លានដុល្លារ សម្រាប់ការអភិវឌ្ឍលើវិស័យសំខាន់ៗ ដូចជា ហេដ្ឋារចនាសម្ព័ន្ធ ថាមពលនិងអគ្គិសនី អប់រំ សុខាភិបាល កសិកម្ម និងប្រព័ន្ធធារាសាស្ត្រជាដើម៕