ភ្នំពេញ៖ កម្ពុជា បាននាំចេញនូវផលិតផលដំណាំជាង ១២លានតោន ទៅកាន់ ៩៥ប្រទេស ដែលគិតជាទឹកប្រាក់ប្រមាណ ៥,៣ពាន់លានដុល្លារ ក្នុងឆ្នាំ២០២៤។ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ដូច្នេះ ក្នុងពិធីបើកវេទិកា និងពិព័រណ៍កសិកម្មកម្ពុជា (CAFE25) នាថ្ងៃទី៧ ខែមេសា ឆ្នាំ២០២៥។

ក្នុងពិព័រណ៍កសិកម្មកម្ពុជា (CAFE25) និងកិច្ចសន្ទនារវាងតួអង្គក្នុងខ្សែច្រវាក់តម្លៃកសិកម្ម នៅសណ្ឋាគារសាងគ្រីឡាភ្នំពេញ ឯកឧត្តម ឌិត ទីណា បានលើកឡើងថា ក្នុងឆ្នាំ២០២៤ វិស័យកសិកម្ម បានចូលរួមចំណែកប្រមាណ ១៦,៧% នៃផលិតផលសរុបក្នុងស្រុក គិតជាតម្លៃបច្ចុប្បន្ន បូករួមជាមួយនឹងតម្លៃបន្ថែមសរុប កើនឡើងដល់ជាង ៧,៨២ពាន់លានដុល្លារ។ ឯកឧត្តមរដ្ឋមន្រ្តី បន្ថែមថា ក្នុងអនុវិស័យដំណាំ បានចូលរួមចំណែក ៦១,៣%, អនុវិស័យផលិតកម្មសត្វ ១៥,៤%, អនុវិស័យជលផល ២០%, និងអនុវិស័យព្រៃឈើ ៣,៣%។

ឯកឧត្តមរដ្ឋមន្រ្តីក្រសួងកសិកម្ម ក៏បានលើកឡើងថា ទោះបីជាវិស័យកសិកម្ម ទទួលបានលទ្ធផលល្អយ៉ាងណា ក៏នៅជួបបញ្ហាប្រឈមមួយចំនួន ដូចជាអស្ថិរភាពនៃប្រព័ន្ធផលិតកម្ម, កង្វះទីផ្សារ, អស្ថិរភាពតម្លៃ និងកង្វះវិនិយោគលើការកែច្នៃជាដើម។ ពាក់ព័ន្ធនឹងបញ្ហានេះ ឯកឧត្តម ឌិត ទីណា បានសង្កត់ធ្ងន់ថា ការសិក្សា អំពីដំណើរវិវត្តនៃវិស័យកសិកម្មកម្ពុជា នាពេលកន្លងមក រួមជាមួយនឹងនិន្នាការបច្ចុប្បន្ន និងសក្តានុពល នាពេលអនាគត គឺជារឿងចាំបាច់ ដែលអង្គវេទិកាត្រូវជជែកពិភាក្សា។ នេះបើតាមទីភ្នាក់ងារសារព័ត៌មានកម្ពុជា (AKP)៕