ភ្នំពេញ៖ រដ្ឋាភិបាលកូរ៉េ ផ្តល់មូលនិធិតាមរយៈទីភ្នាក់ងារ KOICA ចំនួន ១១,៧លានដុល្លារ លើកកម្ពស់ប្រសិទ្ធភាព និងប្រសិទ្ធផលនៃរដ្ឋបាលសាធារណៈនៅកម្ពុជា តាមរយៈការកសាងសេវាសាធារណៈ ប្រកបដោយវិជ្ជាជីវៈ គណនេយ្យភាព និងត្រៀមខ្លួនជាស្រេចនាពេលអនាគត។ ជាមួយគ្នានេះ ទីភ្នាក់ងារ KOICA និងក្រសួងមុខងារសាធារណៈកម្ពុជា បានផ្លាស់ប្តូរកំណត់ហេតុនៃកិច្ចពិភាក្សា(RD) សម្រាប់គម្រោងស្តីពីការពង្រឹងសមត្ថភាពសាលាភូមិន្ទរដ្ឋបាល(RSA)។

តាមការចុះផ្សាយរបស់ KOICA នាថ្ងៃទី០៣ ខែមេសា ឆ្នាំ២០២៥ បានឱ្យដឹងថា កំណត់ហេតុនៃRD ត្រូវអនុវត្តពីឆ្នាំ២០២៥ ដល់ឆ្នាំ២០២៩។ គម្រោងពង្រឹងសមត្ថភាពសាលាភូមិន្ទរដ្ឋបាល(RSA)នេះ នឹងបង្កើតកម្មវិធីសិក្សា និងខ្លឹមសារបណ្តុះបណ្តាលលម្អិតសម្រាប់ការអប់រំបច្ចេកវិទ្យាគមនាគមន៍ ព័ត៌មានវិទ្យា ICT សមស្របទៅនឹងតម្រូវការវិវត្តនៃរដ្ឋាភិបាលឌីជីថល។ កម្មវិធីនេះ នឹងលើកកម្ពស់សមត្ថភាពរបស់មន្ត្រីរាជការក្នុងការប្រើប្រាស់ឧបករណ៍ និងប្រព័ន្ធឌីជីថលក្នុងការងារប្រចាំថ្ងៃ។

ជាមួយគ្នានេះ លោកស្រី ឆយ មូន ជុង នាយិកា ទីភ្នាក់ងារ KOICA ប្រចាំកម្ពុជា បានលើកឡើង គម្រោងនេះ គឺជាមូលដ្ឋានគ្រឹះនៃការគាំទ្ររបស់ KOICA សម្រាប់កំណែទម្រង់អភិបាលកិច្ចរបស់កម្ពុជា។ តាមរយៈការពង្រឹងសាលាភូមិន្ទរដ្ឋបាលនេះ នឹងរួមចំណែកដល់ការសម្រេចបាននូវយុទ្ធសាស្ត្របញ្ចកោណ និងចក្ខុវិស័យកម្ពុជាឆ្នាំ២០៥០ ជាពិសេសក្នុងវិស័យអាទិភាពនៃបរិវត្តកម្មមូលធនមនុស្សនិងឌីជីថល។ ការគាំទ្ររបស់ KOICA នេះ នឹងគ្របដណ្តប់លើការបញ្ជូនអ្នកជំនាញ ការអភិវឌ្ឍយុទ្ធសាស្ត្រធនធានមនុស្សថ្នាក់ជាតិ ការរចនាកម្មវិធីសិក្សា ការអភិវឌ្ឍប្រព័ន្ធការផ្តល់បច្ចេកវិទ្យាគមនាគមន៍ ព័ត៌មានវិទ្យា (ICT) និងសម្ភារៈ បរិក្ខារអប់រំ និងកម្មវិធីកសាងសមត្ថភាពទាំងនៅកម្ពុជា និងនៅប្រទេសកូរ៉េ៕