ភ្នំពេញ៖ មូលនិធិអាកាសធាតុបៃតង (GCF) បានកៀរគរមូលនិធិប្រមាណ ២២០លានដុល្លារ សម្រាប់ផ្តល់ហិរញ្ញប្បទានដល់ក្រុមហ៊ុននៅក្នុងប្រទេសអាស៊ានចំនួន ៥រួមទាំងកម្ពុជា ដើម្បីឱ្យក្រុមហ៊ុនក្នុងប្រទេសនីមួយៗ អនុវត្តដំណោះស្រាយបៃតងក្នុងខ្សែច្រវាក់ផលិតកម្មរបស់ខ្លួន។ នេះបើតាមការលើកឡើងរបស់លោកស្រី Shomi Kim នាយិកាវិទ្យាស្ថានកំណើនបៃតងសកល (GGGI) ប្រចាំកម្ពុជា។

នាជំនួបពិភាក្សាការជំរុញគំនិតផ្តួចផ្តើមឧស្សាហកម្មបៃតងនៅកម្ពុជា កាលពីថ្ងៃទី២ ខែមេសា ឆ្នាំ២០២៥ លោកស្រី Shomi Kim បានបញ្ជាក់ថា ការងារដែល GGGI កំពុងអនុវត្ត គឺដើម្បីផ្សារភ្ជាប់សហគ្រាសធុនតូចនិងមធ្យមក្នុងស្រុក ជាមួយក្រុមហ៊ុនសកលលើការជួញដូរឥណទានកាបូន។ លោកស្រីនាយិកា បានបន្តថា វិទ្យាស្ថាន GGGI កំពុងគាំទ្រក្រុមហ៊ុនក្នុងស្រុក លើការបោះផ្សាយមូលបត្របំណុលបៃតង និងគាំទ្រធនាគារក្នុងស្រុកឱ្យទទួលបានការវាយតម្លៃទទួលស្គាល់ពីមូលនិធិ GCF សម្រាប់ការផ្តល់ហិរញ្ញប្បទានបៃតង។

បន្ថែមលើនេះ លោកស្រី Shomi Kim បានប្តេជ្ញាចិត្តរបស់ GGGI ក្នុងការគាំទ្រកំណើនបៃតងរបស់កម្ពុជា តាមរយៈគម្រោងឧស្សាហកម្មបៃតង និងគម្រោងធុរកិច្ចដែលប្រើបច្ចេកវិទ្យាមេត្រីភាពអាកាសធាតុផ។ ជាមួយគ្នានេះ ឯកឧត្តម ហែម វណ្ណឌី បានសរសើរវិទ្យាស្ថាន GGGI ដែលបានរួមចំណែកលើកកម្ពស់ប្រសិទ្ធភាពថាមពលក្នុងវិស័យកាត់ដេរ និងទំនិញធ្វើដំណើរ។

ឯកឧត្តម ហែម វណ្ណឌី បានស្នើឱ្យវិទ្យាស្ថាន GGGI និងមូលនិធិ GCF ដើរតួជាសំឡេងតំណាងឱ្យប្រទេសដែលមានសេដ្ឋកិច្ចតូច ដោយតស៊ូមតិលើការអនុវត្តគោលការណ៍បៃតងប្រកបដោយសមធម៌ ជាពិសេសសម្រាប់ប្រទេសដែលមានសេដ្ឋកិច្ចតូច និងសមត្ថភាពអនុលោមភាពនៅមានកម្រិត។ ក្នុងជំនួបនោះផងដែរ ឯកឧត្តម ហែម វណ្ណឌី បានសង្កត់ធ្ងន់លើតុល្យភាពរវាងការធ្វើឱ្យឧស្សាហកម្មកម្ពុជាកាន់តែបៃតង និងការលើកកម្ពស់ភាពប្រកួតប្រជែងនៃឧស្សាហកម្ម។

ឯកឧត្តមរដ្ឋមន្ត្រីក្រសួងឧស្សាហកម្ម ក៏បានលើកទឹកចិត្តឱ្យ GGGI ពង្រីក និងចែករំលែកភាពជោគជ័យនៃកំណើនបៃតង បន្ថែមពីលើប្រសិទ្ធភាពថាមពល ដូចជាការប្រើប្រាស់ទឹក និងការគ្រប់គ្រងកាកសំណល់របស់រោងចក្រជាដើម និងស្នើឱ្យ GGGI ផ្តល់ការគាំទ្រក្នុងការរៀបចំគោលការណ៍ណែនាំស្តីពីការបង្កើតសួនអេកូឧស្សាហកម្ម សម្រាប់ជាគំរូនៃការអភិវឌ្ឍឧស្សាហកម្មប្រកបដោយនិរន្តរភាពផងដែរ៕