ភ្នំពេញ៖ កំពង់ផែស្វយ័តភ្នំពេញ (ក.ស.ភ.) រកចំណូលបាន ៣ ៥៤៥ ០២៥ដុល្លារ (ពុំទាន់ធ្វើសវនកម្ម) រយៈពេលពេញមួយខែមករា ក្នុងឆ្នាំ២០២៥ កើនឡើងបាន ៣៤% បើធៀបនឹងចំណូលក្នុងខែមករា ឆ្នាំ២០២៤។ នេះបើតាមសេចក្តីប្រកាសព័ត៌មាន ដែលកំពង់ផែស្វយ័តភ្នំពេញ ចេញផ្សាយនាថ្ងៃទី១៤ ខែកុម្ភៈ ឆ្នាំ២០២៥។

ចំណូលជាង ៣លានដុល្លារនោះ ទទួលបានពីប្រតិបត្តិការផែ (Port Operation) ២ ៩០១ ៨៤៩ដុល្លារ កើនឡើង ៣៣%, ចំណូលពីអាជ្ញាធរផែ (Port Authority) ចំនួន ៥៤១ ៦៧៧ដុល្លារ កើនឡើង ៣០% និងចំណូលពីសេវាកម្មផ្សេងៗ (Other Services) ១០១ ៤៩៩ដុល្លារ កើនឡើង ១០១% ធៀបនឹងឆ្នាំ២០២៤។

គួរបញ្ជាក់ថា ក្នុងខែមករា ឆ្នាំ២០២៥ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញមានចំនួន ៤៤ ៣៧៩ ទូ (TEUs) មានការកើនឡើងចំនួន ៤៨,៣៩% បើធៀបនឹងខែមករា ឆ្នាំ២០២៤ ដែលមានចំនួន ២៩ ៩០៨ ទូ៕