ភ្នំពេញ៖ ក្រុមហ៊ុនក្នុងវិស័យយានយន្ត និងអេឡិចត្រូនិកចំនួន៤ បង្ហាញពីឆន្ទៈក្នុងការពង្រីកការវិនិយោគ បន្ថែមនៅកម្ពុជា។ នេះបើតាមការលើកឡើងរបស់ តំណាងក្រុមហ៊ុនទាំង៤ ក្នុងដំណើរទស្សនកិច្ចរបស់ ឯកឧត្តម ជា សុជាតិ លេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយ អភិវឌ្ឍន៍វិស័យឧស្សាហកម្មកម្ពុជា (IDP)។

ក្រុមហ៊ុនចំនួន៤ នោះ រួមមានក្រុមហ៊ុន GTV MOTOR CO.,LTD ដែលផ្គុំ និងតម្លើងរថយន្ត SUV និង Mini SUV, SEIKAWA (CAMBODIA) TECHNOLOGY CO., LTD ផលិតគ្រឿងបង្គុំអេឡិចត្រូនិក និងអគ្គិសនីធ្វើពីប្លាស្ទិក, ក្រុមហ៊ុន MARUSAN PLASTIC (PHNOM PENH) CO., LTD ផលិតសម្ភារបន្សំរបស់រថយន្ត និងសម្ភារសំណង់ និងក្រុមហ៊ុន KUANTECH (CAMBODIA) CORPORATION LIMITED ផលិត និងផ្គុំដំឡើងឧបករណ៍បញ្ចូលភ្លើង កុំព្យូទ័រ និងទូរសព្ទ។

ក្នុងដំណើរទស្សនៈកិច្ចរបស់ ឯកឧត្តម ជា សុជាតិ នាយករងខុទ្ទកាល័យ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ទៅកាន់ទីតាំងផ្ទាល់របស់ក្រុមហ៊ុនខាងលើនេះ តំណាងក្រុមហ៊ុនទាំងអស់ បានវាយតម្លៃខ្ពស់ចំពោះការខិតខំប្រឹងប្រែងរបស់រាជរដ្ឋាភិបាល និងការសម្របសម្រួលរបស់ក្រុមប្រឹក្សាអភិវឌ្ឍន៍កម្ពុជា ក្នុងការផ្ដល់សេវាសាធារណៈ និងការយកចិត្តទុកដាក់ថែទាំដល់ក្រុមហ៊ុន ដែលបានមកវិនិយោគនៅកម្ពុជាផងដែរ។

ដំណើរទស្សនកិច្ច កាលពីថ្ងៃទី៣១ ខែមីនា ឆ្នាំ២០២៥ នេះ គឺមានគោលបំណងស្វែងយល់ឱ្យកាន់តែច្បាស់ ពីស្ថានភាពជាក់ស្តែងរបស់បណ្តាក្រុមហ៊ុនក្នុងវិស័យយានយន្តនិងអេឡិចត្រូនិក រួមមានកត្តាផលិតកម្ម ខ្សែច្រវ៉ាក់ផលិតកម្ម ទីផ្សារ បញ្ហាប្រឈម ចក្ខុវិស័យអាជីវកម្ម និងសំណូមពរជាដើម ដែលទាំងនេះ នឹងជាធាតុចូលបន្ថែមសម្រាប់រៀបចំរបាយការណ៍វឌ្ឍនភាព ២ឆ្នាំ គឺឆ្នាំ ២០២៣-២០២៤ នៃការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា៕