ភ្នំពេញ៖ កម្ពុជា សម្រេចបានការនាំចេញទំនិញទៅកាន់ទីផ្សារអន្តរជាតិ គិតជាទឹកប្រាក់ប្រមាណ ២០ ៤៩៤លានដុល្លារ ក្នុងរយៈពេល ១១ខែ នៅឆ្នាំ២០២៣ មានការកើនឡើង១,២ភាគរយ បើធៀបទៅនឹងឆ្នាំ២០២២ ដែលមានចំនួន ២០ ២៤៣លានដុល្លារ។ ចំពោះការនាំចូលទំនិញមកកម្ពុជា វិញ មានទំហំទឹកប្រាក់ ២២ ០០៦លានដុល្លារ ធ្លាក់ចុះ៥,៤ភាគរយ បើធៀបទៅនឹងឆ្នាំ២០២២ ដែលមានចំនួន ២៣ ២៦៥លានដុល្លារ។

យោងតាមរបាយការណ៍នាំចេញនាំចូលទំនិញរបស់អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី១១ ខែធ្នូនេះ ចាប់ពីខែមករា ដល់វិច្ឆិកា ឆ្នាំ២០២៣ ការនាំចេញទំនិញទៅកាន់ប្រទេសច្រើនជាងគេមាន សហរដ្ឋអាម៉េរិក វៀតណាម និងចិន។ ការនាំចេញទៅសហរដ្ឋអាម៉េរិកមានទំហំ ៨ ១១៤លានដុល្លារ ថយចុះ ០,៩ភាគរយ បើធៀបនឹងឆ្នាំ២០២២ មានចំនួន ៨ ២១៧លានដុល្លារ។

ចំពោះ ប្រទេសវៀតណាម កម្ពុជា ក៏បាននាំចេញទំនិញក្នុងទំហំទឹកប្រាក់ ២ ៦១១លានដុល្លារ មានការកើនឡើងជិត ៣៨ភាគរយ ជាងឆ្នាំ២០២២ គឺ ១ ៨៩៤លានដុល្លារ។ រីឯ ប្រទេសចិនវិញ កម្ពុជា បាននាំចេញទំនិញប្រមាណ ១ ៣១៤លានដុល្លារ មានការកើនឡើងជាងឆ្នាំ២០២២ ជិត ១៩ភាគរយ។ លើសពីនេះ ប្រទេសផ្សេងទៀត ដែលកម្ពុជានាំចេញមានដូចជា ជប៉ុន កាណាដា អាល្លឺម៉ង់ អង់គ្លេស ហូឡង់ អេស្ប៉ាញ ថៃ បែលហ្សិក ឥណ្ឌា កូរ៉េខាងត្បូង អ៊ីតាលី បារាំង ឥណ្ឌូនេស៊ី ហុងកុង ម៉ិកស៊ិក អូស្ត្រាលី ម៉ាឡេស៊ី និងផ្សេងៗទៀត។

គួរបញ្ជាក់ថា ទំនិញដែលកម្ពុជាបាននាំចេញរួមមាន៖ សម្លៀកបំពាក់ និងគ្រឿងបន្ទាប់បន្សំ ដែលធ្វើឡើងពីក្រណាត់, ម៉ាស៊ីន និងឧបករណ៍អគ្គិសនី, កៅស៊ូ និងផលិតធ្វើអំពីកៅស៊ូ និងកសិផលផ្សេងៗទៀត៕