ភ្នំពេញ៖ ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងនិងជាអនុប្រធានក្រុមអ្នកនាំពាក្យ ប្រតិកម្មរហ័សនិងយុទ្ធសាស្រ្តនៃរដ្ឋសភា បញ្ជាក់ថា រដ្ឋសភា គាំទ្ររាល់សំណើ និងគោលនយោបាយណា ដែលមានគោលដៅលើកកម្ពស់ប្រាក់រៀល និងព្យាយាមប្រមូលធាតុចូលពីភាគីពាក់ព័ន្ធ ដើម្បីឱ្យរាជរដ្ឋាភិបាលពិចារណាក្នុងការដាក់ចេញ ដើម្បីលើកកម្ពស់ប្រាក់រៀល។

បើតាមការលើកឡើងរបស់ ឯកឧត្តមបណ្ឌិត ឈាង វណ្ណារិទ្ធ បន្ថែមថា រដ្ឋសភា នឹងតាមដានវឌ្ឍនភាព នៃការប្រើប្រាស់ប្រាក់រៀល និងជជែកពិភាក្សាពីវឌ្ឍនភាព និងបញ្ហាប្រឈមក្នុងការលើកកម្ពស់ប្រាក់រៀលជាមួយរាជរដ្ឋាភិបាលឱ្យបានញឹកញាប់។ ជាមួយគ្នានេះ រដ្ឋសភា នឹងចូលរួមជាមួយរាជរដ្ឋាភិបាល ក្នុងការលើកកម្ពស់ការយល់ដឹងពីប្រាក់រៀលក្នុងចំណោមប្រជាពលរដ្ឋ និងសាធារណជនផងដែរ។

អគ្គលេខាធិការដ្ឋានរដ្ឋសភានិងអគ្គលេខាធិការដ្ឋានព្រឹទ្ធសភា និងធនាគារជាតិនៃកម្ពុជា នឹងរៀបចំសិក្ខាសាលាស្តីពី «ប្រាក់រៀល ប្រព័ន្ធបាគង និងខេអេចខ្យូអ (KHQR)» ដើម្បីលើកកម្ពស់ និងជំរុញការប្រើប្រាស់ប្រាក់រៀល ដែលជារូបិយវត្ថុជាតិ ឱ្យមានការរីកចម្រើនខ្លំាងឡើង។ សិក្ខាសាលា ដែលរៀបចំឡើងក្នុងឱកាសខួបលើកទី៤៥ នៃការដាក់ឱ្យចរាចរណ៍ប្រាក់រៀលឡើងវិញ នៅថ្ងៃទី២០ ខែមីនា ឆ្នាំ២០២៥ គឺជាសិក្ខាសាលាទី២ ដែលអគ្គលេខាធិការដ្ឋានរដ្ឋសភា បានរៀបចំឡើងធ្វើឡើងនៅក្នុងអាណត្តិរដ្ឋសភានីតិកាលទី៧ ក្នុងការជំរុញនិងលើកកម្ពស់ការប្រើប្រាស់រូបិយវត្ថុជាតិ។ នេះបើតាមការចុះផ្សាយរបស់រដ្ឋសភាកម្ពុជា នាថ្ងៃទី១៨ ខែមីនា ឆ្នាំ២០២៥៕