ភ្នំពេញ៖ ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា និង ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល ពិភាក្សាគ្នាអំពីវិស័យថាមពល ការធ្វើអាជីវកម្មរ៉ែប្រកបដោយការទទួលខុសត្រូវ និងការវិនិយោគ ដើម្បីអនាគតកម្ពុជា។

បើតាមការចុះផ្សាយរបស់ក្រសួងរ៉ែ តាមរយៈភាពដៃគូកម្ពុជា និងអូស្ត្រាលីជាង ៧០ឆ្នាំ កន្លងមកនេះ ភាគីទាំងពីរ រួមគ្នារក្សាសន្តិភាពរហូតឈានដល់ការជំរុញកំណើនសេដ្ឋកិច្ច ភាពជាដៃគូនេះបានវិវត្ត និងបន្តផ្ដល់ឱកាសកាន់តែច្រើនថែមទៀត នាពេលអនាគត។

ក្នុងជំនួប នាថ្ងៃទី១៧ ខែមីនា ឆ្នាំ២០២៥ ឯកឧត្តម កែវ រតនៈ លើកឡើងថា អូស្ត្រាលី នៅតែជាដៃគូដ៏មានតម្លៃក្នុងការអភិវឌ្ឍប្រកបដោយចីរភាព ហើយក្នុងនោះកម្ពុជា និងអូស្ត្រាលីផ្តល់តម្លៃនៃទំនាក់ទំនងភាពជាដៃគូនេះ បន្តដល់អ្នកជំនាន់ក្រោយទៀត។ គួរបញ្ជាក់ថា ទំនាក់ទំនងការទូតរវាងកម្ពុជា និងអូស្ត្រាលី ត្រូវបានបង្កើតឡើងលើគោលការណ៍គោរពសិទ្ធិគ្នាទៅវិញទៅមក និងមានគោលដៅរួមគ្នា៕