ភ្នំពេញ៖ កម្ពុជា-អាម៉េរិក ពិភាក្សាពង្រឹង និងពង្រីកកិច្ចសហប្រតិបត្តិការឱ្យកាន់តែល្អប្រសើរ និងរឹងមាំបន្ថែមទៀត លើវិស័យជាច្រើនរួមមាន វិស័យនយោបាយ, សេដ្ឋកិច្ច, ពាណិជ្ជកម្ម, វិនិយោគ, អប់រំ, សុខាភិបាល, ការពារជាតិនិងសន្តិសុខ និងការបោសសម្អាតមីន។ នេះបើតាមការចុះផ្សាយរបស់សម្ដេចធិបតី ហ៊ុន ម៉ាណែត កាលពីថ្ងៃទី១៧ ខែកុម្ភៈ ឆ្នាំ២០២៥។

ក្នុងជំនួបជាមួយសម្ដេចធិបតី ហ៊ុន ម៉ាណែត និងគណៈប្រតិភូសភាអាម៉េរិកចំនួន ៣រូប រួមមាន៖ ឯកឧត្តម Jimmy Panetta, ឯកឧត្តម Salud Carbajal និងឯកឧត្តម Darin Lahood នេះ គណៈប្រតិភូអាម៉េរិក បានលើកឡើងអំពីការបន្តធ្វើការជាមួយរដ្ឋាភិបាលអាម៉េរិកឱ្យកាន់តែយល់ដឹងច្បាស់អំពីកម្ពុជាបន្ថែមទៀត ដើម្បីជំរុញការពង្រឹងទំនាក់ទំនង និងកិច្ចសហប្រតិបត្តិការក្នុងភាពជាដៃគូអាម៉េរិក-កម្ពុជា ឱ្យកាន់តែរឹងមាំ។

សម្ដេចធិបតី ហ៊ុន ម៉ាណែត អរគុណចំពោះរដ្ឋាភិបាលសហរដ្ឋអាម៉េរិក និងប្រជាជន ដែលបានចូលរួមគាំទ្រដល់ដំណើរការអភិវឌ្ឍសង្គម-សេដ្ឋកិច្ចកម្ពុជា។ សម្ដេចធិបតី ហ៊ុន ម៉ាណែត ក៏បានគូសបញ្ជាក់ថា ដំណើរទស្សនកិច្ចរបស់គណៈប្រតិភូនាឱកាសនេះ នឹងចូលរួមចំណែកបន្ថែមទៀតក្នុងការជំរុញការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ និងលើកកម្ពស់ទំនាក់ទំនងប្រទេសទាំងពីរឱ្យឈានដល់កម្រិតខ្ពស់បន្ថែមទៀត៕