ភ្នំពេញ៖ «តំបន់សេដ្ឋកិច្ចពិសេស» ជាទីតាំងអំណោយផលចំពោះការទាក់ទាញអ្នកវិនិយោគពីបរទេស ពិសេសលើឧស្សាហកម្មដែលមានតម្លៃខ្ពស់។ តំបន់សេដ្ឋកិច្ចពិសេស បានរួមចំណែកទៅលើសកម្មភាពនៃការដឹកជញ្ជូនទំនិញចេញ-ចូល និងកាត់បន្ថយចំនួនអ្នកគ្មានការងារ តាមរយៈការផ្តល់ឱកាសការងារតាមមុខជំនាញ ដែលកត្តានេះបានរួមចំណែកមួយផ្នែកធំក្នុងដំណើរការសេដ្ឋកិច្ច។

បច្ចុប្បន្ន តំបន់សេដ្ឋកិច្ចពិសេស មានចំនួន៤២ និងបានដំណើរការចំនួន២៤ ដែលប្រមូលផ្តុំនៅរាជធានីភ្នំពេញ ខេត្តបន្ទាយមានជ័យ កោះកុង ស្វាយរៀង និងព្រះសីហនុ ដែលជាខេត្តនៅតាមតំបន់ព្រំដែន និងភាគច្រើននៅជាប់ច្រកព្រំដែនអន្តរជាតិ។ ទន្ទឹមនឹងនេះ ការដឹកជញ្ជូននៅតំបន់សេដ្ឋកិច្ចពិសេសភាគច្រើននៅតាមតំបន់ព្រំដែន ដោយឡែកភ្នំពេញប្រើប្រាស់របៀងដឹកជញ្ជូនទៅកាន់ច្រកនាំចេញ ដូចជាកំពង់ផែអន្តរជាតិ ផ្លូវថ្នល់ ផ្លូវដែកជាដើម។ តំបន់សេដ្ឋកិច្ចពិសេស ក៏បានរួមចំណែកក្នុងការផ្តល់ឱកាសការងារប្រមាណ ចំនួន១៦៨ ១៥១កន្លែង ស្មើនឹង ១% នៃការងារសរុប និង៣,៧% នៃការងារឧស្សាហកម្មបន្ទាប់បន្សំនៅកម្ពុជា។

ប្រភពដកស្រង់ពីសៀវភៅ៖ ផែនការគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣