ភ្នំពេញ៖ អគ្គនាយកដ្ឋានគយនិងរដ្ឋាករកម្ពុជា (អគរ) និងសមាគមធុរកិច្ចជប៉ុននៅកម្ពុជា (JBAC) បេ្តជ្ញាបន្តពង្រឹងកិច្ចសហការជាមួយគ្នាបន្ថែមទៀត ក្នុងគោលដៅសម្រួលពាណិជ្ជកម្ម និងកែលម្អបរិយាកាសធុរកិច្ច ដើម្បីរួមចំណែកអភិវឌ្ឍន៍សេដ្ឋកិច្ចកម្ពុជា ឱ្យកាន់តែរីកចម្រើន។

ក្នុងកិច្ចពិភាក្សាបន្ដស្វែងរកដំណោះស្រាយកែលម្អបរិយាកាសធុរកិច្ចនៅកម្ពុជា ឯកឧត្តម ផា អេងវ៉េង អគ្គនាយករងគយ និងលោក TABEI Hideaki ប្រធាន JBAC ក៏បានជជែកពីបញ្ហា និងសំណូមពរចំនួន៣ ពាក់ព័ន្ធនីតិវិធីគយ រួមមាន៖ ការអនុវត្ដនីតិវិធីបំពេញបែបបទគយ និងការជំរុញបើកដំណើរការជាផ្លូវការមាត់ច្រកស្ទឹងបត់-បានណងអៀន, ការធ្វើទំនើបកម្មនិងសាមញ្ញកម្មនីតិវិធីគយ និងវឌ្ឍនភាពនៃការសាងសង់អាកាសយានដ្ឋានអន្តរជាតិតេជោ។

លោក TABEI Hideaki បានអរគុណ ដែលគយបានដាក់ចេញនូវវិធានការជាបន្ដបន្ទាប់ ឆ្លើយតបបញ្ហាដែលបានលើកឡើងដោយ JBAC នាពេលកន្លងមក ប្រកបដោយប្រសិទ្ធភាព។ គួរបញ្ជាក់ថា ក្នុងជំនួប កាលពីថ្ងៃទី៥ ខែកុម្ភៈ ឆ្នាំ២០២៥ ឯកឧត្តម ផា អេងវ៉េង ក៏បានលើកឡើងពីវឌ្ឍនភាពការងាររបស់ អគរ ក្នុងការធ្វើទំនើបកម្ម និងសាមញ្ញកម្មនីតិវិធីគយ សំដៅផ្ដល់កិច្ចសម្រួលពាណិជ្ជកម្មជូនធុរជនផងដែរ៕