ភ្នំពេញ៖ រោងចក្រម៉ូតូក្រុមហ៊ុន អិន ស៊ី អិច (NCX) ដែលដំឡើងម៉ូតូចែកចាយលើទីផ្សារបាន ២៥ម៉ឺនគ្រឿង នៅឆ្នាំ២០២៤ បានផ្តល់ការងារដល់បុគ្គលិក និងកម្មករខ្មែរសរុប ១,២២១នាក់ និងបរទេស ៧នាក់ ដោយទទួលបានប្រាក់ឈ្នួលទាបបំផុតជិត ៣០០ដុល្លារ សម្រាប់ដំណើរការដំឡើង និងផលិតគ្រឿងបន្លាស់។

បើតាមការចុះផ្សាយរបស់ សម្តេចធិបតី ហ៊ុនម៉ាណែត នាថ្ងៃទី០៥ ខែកុម្ភៈ ឆ្នាំ២០២៥ បច្ចុប្បន្ន ក្រុមហ៊ុន ខាងលើដំឡើងម៉ូតូចំនួន ៥ប្រភេទ រួមមាន៖ Click, Scoopy, Dream, Wave និង Beat ជាមួយនឹងសមត្ថភាពដំឡើងម៉ូតូបានចំនួន ចាប់ពី៦៥០-១៥០០គ្រឿង ក្នុងមួយថ្ងៃ ដោយក្នុងឆ្នាំ១៩៩៩ ក្រុមហ៊ុនមានសមត្ថភាពដំឡើង ត្រឹម៥០គ្រឿងប៉ុណ្ណោះ ក្នុងមួយថ្ងៃ។ ចំណែក មុនពេលជំងឺកូវីដ១៩ រាតត្បាត ក្រុមហ៊ុន NCX អាចដំឡើងម៉ូតូចែកចាយលើទីផ្សារបានប្រមាណ ៤០ម៉ឺនគ្រឿង ក្នុងមួយឆ្នាំ។

គួរបញ្ជាក់ថា ក្រុមហ៊ុន អិន ស៊ី អិច គឺជាក្រុមហ៊ុនឈានមុខគេនៅក្នុងវិស័យឧស្សាហកម្មផលិត និងចែកចាយម៉ូតូ ដែលត្រូវបានចាប់ផ្តើមពី ឆ្នាំ១៩៩២។ ក្រុមហ៊ុន អិន ស៊ី អិច បាននាំចូលផលិតផលសម្រេចម៉ាកហុងដា (CBU) សម្រាប់ទីផ្សារកម្ពុជា ខណៈកំណើនយ៉ាងឆាប់រហ័ស នៃតម្រូវការរបស់អតិថិជន ប្រជាប្រិយភាព និងសន្ទុះនៃការគាំទ្រ ក្រុមហ៊ុនបានបង្កើតខ្សែច្រវាក់ផលិតកម្មដំបូងរបស់ខ្លួននៅរាជធានីភ្នំពេញ ក្នុងឆ្នាំ១៩៩៩៕