ភ្នំពេញ៖ សម្តេចធិបតី ហ៊ុន ម៉ាណែត ថ្លែងថា សាទរចំពោះប្រជាកសិករដែលលក់ទិន្នផលស្រូវបានថ្លៃជាងឆ្នាំកន្លងទៅ ពោលគឺនៅក្នុងឆ្នាំ២០២៣នេះ ប្រជាកសិករអាចលក់ស្រូវបានក្នុងតម្លៃជាមធ្យមចន្លោះពី១,០០០រៀល ទៅ ១,៣០០រៀលក្នុងមួយគីឡូក្រាម ខណៈដែលកាលពីឆ្នាំមុនអាចលក់បានត្រឹមចន្លោះពី៨០០រៀល ទៅ ១,០០០រៀលតែប៉ុណ្ណោះ។

នៅកម្មវិធីប្រកាសដាក់ឱ្យអនុវត្តន៍គោលនយោបាយអាទិភាពទី៥ និងទី៦ របស់រាជរដ្ឋាភិបាល ដែលពាក់ព័ន្ធវិស័យកសិកម្ម កាលពីថ្ងៃទី២០ ខែវិច្ឆិកា ឆ្នាំ២០២៣ សម្តេចធិបតីនាយករដ្ឋមន្ត្រី បានមានប្រសាសន៍ថា ការលក់ទិន្នផលស្រូវបានតម្លៃល្អនេះ គួបផ្សំនឹងការធ្លាក់ចុះនៃតម្លៃវត្ថុធាតុដើមមួយចំនួន ដូចជាជី, ថ្នាំកសិកម្មមួយចំនួន ដែលធ្វើឱ្យកសិករបានកាត់បន្ថយថ្លៃដើមផលិត ដោយអាចរកចំណូលបានជាងរាល់ឆ្នាំ។ សម្តេចធិបតីបញ្ជាក់ថា មិនសំខាន់តែរឿងតម្លៃលក់នោះទេ តែវាសំខាន់ទៅលើតម្លៃផលិតផងដែរ មានន័យថា បើផលិតផលថ្លៃខ្លាំងពេក ទោះលក់បានថ្លៃក៏ចំណេញតិចដែរ។

ប្រមុខរាជរដ្ឋាភិបាលកម្ពុជា បន្តថា ដូច្នេះហើយបានរាជរដ្ឋាភិបាល យកចិត្តទុកដាក់នៅក្នុងការដាក់ចេញនៅគោលនយោបាយអនុគ្រោះ និងលើកទឹកចិត្តដោយធ្វើយ៉ាងណាអាចកាត់បន្ថយតម្លៃផលិតផល ដើម្បីធានាការប្រកួតប្រជែង និងកាត់បន្ថយការដឹកជញ្ជូន នោះអាចនឹងធ្វើឱ្យផលិតផលកសិកម្មមានការប្រកួតប្រជែង ហើយបានផលទាំងកសិករទៀតផង៕