ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ផ្តល់ដំណោះស្រាយលើបញ្ហាប្រឈមរបស់ក្រុមហ៊ុនប្រមូលទិញមៀនឯកជនចំនួន២ សហគមន៍ ម្ចាស់ចំការ និងកសិករផលិតមៀនប៉ៃលិន នៅខេត្តបាត់ដំបង និងខេត្តប៉ៃលិន ពាក់ព័ន្ធនឹងការខ្វះខាតទុនវិនិយោគសម្រាប់បង្វិលលើការទិញមៀនស្រស់ និងកង្វះពលកម្មបេះមៀន។

ឯកឧត្តម ឌិត ទីណា បានណែនាំ និងលើកទឹកចិត្តដល់សហគមន៍ និងម្ចាស់ចំការ សហការឱ្យបានជិតស្និតជាមួយក្រុមហ៊ុនប្រមូលទិញ និងត្រូវធ្វើកិច្ចសន្យាថ្មីជាមួយគ្នាឱ្យមានតម្លាភាព គោរពតាមលក្ខខណ្ឌកិច្ចសន្យារួម និងស្របតាមស្តង់ដារ ដែលបានកំណត់។ ឯកឧត្តម ឌិត ទីណា បន្តលើកឡើងថា ក្រសួងកសិកម្ម នឹងធ្វើកិច្ចសហការជាមួយ គណៈកម្មាធិការជាតិគ្រប់គ្រងគ្រោះមហន្តរាយ ដើម្បីផ្តល់កងកម្លាំងទាហាន ជួយប្រមូលផលមៀន ដោះស្រាយបញ្ហាទាន់ពេលវេលា ដើម្បីងាយស្រួលចែកចាយមៀនស្រស់ និងដំណាប់មៀនសម្ងួត នៅលើទីផ្សារក្នុងស្រុក និងក្រៅស្រុក ឱ្យបានប្រសិទ្ធភាព និងប្រសិទ្ធផលខ្ពស់។

ឯកឧត្តម ឌិត ទីណា ក៏បានជំរុញឱ្យកសិករ នៅបាត់ដំបង និងប៉ៃលិន ចងក្រងជាសហគមន៍កសិកម្មទំនើប ដើម្បីកាត់បន្ថយថ្លៃដើមផលិត និងការទិញធាតុចូលកសិកម្មជាលក្ខណៈទ្រង់ទ្រាយធំ មានផែនការផលិតកម្មច្បាស់លាស់ អាចផ្គត់ផ្គង់តាមតម្រូវការទីផ្សារ មានកិច្ចសន្យាផលិតកម្មត្រឹមត្រូវ ទទួលបានកម្ចីការប្រាក់ទាប និងមានទីផ្សារពិតប្រាកដ។

គួរបញ្ជាក់ថា ក្រុមហ៊ុនពេជ្រចិន្តា ហ្វ្រ៊ូត ប្រូដាក់សិន ភីអេហ្វភី ឯ.ក និងតំណាងសហគមន៍ ម្ចាស់ចំការ នៅបាត់ដំបង មានបញ្ហាប្រឈមជុំវិញការខ្វះខាតទុនវិនិយោគសម្រាប់បង្វិលទិញផលិតផលមៀនស្រស់ ខ្វះខាតប្រព័ន្ធអគ្គិសនីប្រើប្រាស់នៅក្នុងក្រុមហ៊ុន និងការប្រមូលទិញ មានភាពយឺតយ៉ាវចំពោះការបេះមៀនប៉ៃលិនស្រស់ ពីស្រុកសំពៅលូន ស្រុកភ្នំព្រឹក ស្រុកកំរៀង និងនៅស្រុកម៉ាឡៃ ខេត្តបាត់ដំបង។ ដោយឡែក ក្រុមហ៊ុន ឆាយណាជីនវ័រយាន អ៊ីមផត អិចផត (ខេមបូឌា) ឯ.ក សហគមន៍ និងម្ចាស់ចំការ នៅប៉ៃលិន មានបញ្ហាជុំវិញការប្រមូលទិញ និងបេះមៀនប៉ៃលិនស្រស់ ដោយសារបេះមិនទាន់ពេលវេលា និងធ្វើឱ្យមានការខូចខាតច្រើន៕