ភ្នំពេញ៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានអំពាវនាវឱ្យប្រជាពលរដ្ឋកុំប្រើកម្ចីអនឡាញ ព្រោះកម្ចីជាកម្ចីគ្រោះថ្នាក់។ អភិបាលខេត្តកណ្ដាលលើកឡើងបែបនេះ នៅក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុចំនួន ២,០៥០បណ្ណ ដល់ប្រជាពលរដ្ឋ ដែលស្ថិតនៅភូមិឫស្សីជ្រោយ និងភូមិជ្រោយមេត្រីក្រោម ឃុំឫស្សីជ្រោយ និងភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្តាល។

ក្នុងពិធីចែកវិញ្ញាបនបត្រនាថ្ងៃទី០២ ខែមករា ឆ្នាំ២០២៥ អភិបាលខេត្តកណ្ដាល បានបន្តថា កម្ចីអនឡាញនេះ មានការខ្ចីពីមួយទៅមួយបន្តគ្នា ហើយចំនួននៃការជំពាក់មានការកើនឡើងទ្វេដង ដូច្នេះប្រសិនបើប្រជាពលរដ្ឋណា មានការជំពាក់កម្ចីអនឡាញ អាចរាយការណ៍មកអាជ្ញាធរមូលដ្ឋាន ឬរាយការណ៍មកឯកឧត្តមផ្ទាល់ ដើម្បីឱ្យអាជ្ញាធរពិនិត្យ និងសម្របសម្រួលជៀសវាងបំណុលអនឡាញមានការកើនឡើង។

ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុនេះ លោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្មសំណង់ និងសូរិយោដីខេត្តកណ្ដាល បានឱ្យដឹងថា គិតមកដល់ពេលនេះមន្ទីរ បានចុះបញ្ជីចំនួន ៦០ឃុំ/សង្កាត់ មាន ៥៣១ភូមិ ដែលស្មើនឹង ៥២% នៃចំនួនភូមិសរុប ដែលមានក្បាលដីប៉ាន់ស្មានចំនួន ៨៤៩,២៨០ក្បាលដី៕