ភ្នំពេញ៖ ប្រាក់ដែលនៅសល់បន្ទាប់ពីការចំណាយចាំបាច់ (Discretionary Income) គឺជាប្រាក់ដែលបានកាត់កងរួចរាល់ពីការទូទាត់លើពន្ធ និងប្រាក់ចំណាយចាំបាច់នៅក្នុងជីវិតប្រចាំថ្ងៃ មានដូចជា៖ អាហារ, ថ្លៃស្នាក់នៅ, ការធ្វើដំណើរ, ថ្នាំ, ធានារ៉ាប់រង និងសម្លៀកបំពាក់ជាដើម។

បើតាមពុទ្ធិមូលបត្រ ដែលចេញផ្សាយដោយនិយ័តករមូលបត្រកម្ពុជា នាថ្ងៃទី៣១ ខែធ្នូ ឆ្នាំ២០២៤ ដើម្បីគណនាប្រាក់ដែលនៅសល់បន្ទាប់ពីការចំណាយចាំបាច់ គឺត្រូវយល់ឱ្យបានច្បាស់អំពីការចំណាយសំខាន់ៗផ្ទាល់ខ្លួន និងប្រភពនៃប្រាក់ចំណូលទាំងអស់ដែលនៅសល់បន្ទាប់ពីបង់ពន្ធរួច (Disposable income)។ ប្រាក់បៀវត្សរបស់អ្នកនឹងត្រូវកាត់ពន្ធ និងការចំណាយជាកាត្វកិច្ចផ្សេងៗ (Mardatory deductiors) រួមមាន៖ ធានារ៉ាប់រងសុខភាព, ផែនការចូលនិវត្តន៍ និងពន្ធសន្តិសុខសង្គម ដែលអាស្រ័យទៅតាមគោលនយោបាយលើកទឹកចិត្តរបស់ក្រុមហ៊ុន និងស្ថាប័ន នីមួយៗ។

ប្រាក់ចំណូលដែលនៅសល់បន្ទាប់ពីបង់ពន្ធ (Disposable Income) នឹងត្រូវប្រើប្រាស់សម្រាប់តម្រូវការចាំបាច់ ប្រចាំថ្ងៃ រួមមាន៖ ថ្លៃឈ្នួល, ទឹក-ភ្លើង, ប្រាក់កម្ចី, ការធ្វើដំណើរ, ម្ហូបអាហារ និង ចំណាយចាំបាច់ផ្សេងទៀត៕