ភ្នំពេញ៖ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រៀបចំសិក្ខាសាលាស្តីពីគោលការណ៍ណែនាំសម្រាប់ទាក់ទាញបុគុ្គលមានទេពកោសល្យ ដើម្បីជំរុញការអភិវឌ្ឍសង្គម-សេដ្ឋកិច្ចកម្ពុជា តាមរយៈទាក់ទាញអ្នកជំនាញក្នុងវិស័យសំខាន់ៗ ដូចជាវិទ្យាសាស្ត្រ បច្ចេកវិទ្យា សុខាភិបាល និងវិស្វកម្មជាដើម។

ក្នុងសិក្ខាសាលានាថ្ងៃទី២០ ខែធ្នូ ឆ្នាំ២០២៤ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម បានលើកឡើងថា មនុស្សគឺជាធនធានដ៏សំខាន់ ប្រកបដោយចីរភាព សម្រាប់ការអភិវឌ្ឍសេដ្ឋកិច្ច និងសង្គមជាតិ ហើយការទាក់ទាញបុគ្គលមានទេពកោសល្យ គឺជាជំហានដ៏សំខាន់មួយក្នុងរបត់ថ្មីនៃការប្រកួតប្រជែងសេដ្ឋកិច្ច។

ឯកឧត្តម ហែម វណ្ណឌី ក៏បានជំរុញឱ្យក្រសួង-ស្ថាប័នពាក់ព័ន្ធ ចូលរួមកែលម្អគោលការណ៍ណែនាំខាងលើ និងរៀបចំយុទ្ធសាស្ត្រលើកកម្ពស់ចំណេះដឹង សមត្ថភាព ភាពប៉ិនប្រសប់ និងបុគ្គលដែលមានទេពកោសល្យក្នុងវិស័យរបស់ខ្លួន ដោយបង្កលក្ខណៈងាយស្រួល និងជំរុញការចូលរួមរបស់បុគ្គលមានទេពកោសល្យ នៅក្នុងរចនាសម្ព័ន្ធដឹកនាំរបស់ក្រសួង-ស្ថាប័ន។ គោលការណ៍ណែនាំស្តីពីការទាក់ទាញបុគ្គលមានទេពកោសល្យសម្រាប់កម្ពុជានេះ មានគោលបំណងលើកទឹកចិត្តដល់និស្សិតកម្ពុជាដែលបានចេញទៅសិក្សានៅបរទេសឱ្យត្រលប់មកវិញ ដើម្បីរួមចំណែកដល់ការអភិវឌ្ឍជាតិ៕