ភ្នំពេញ៖ វេទិកាអាស៊ីឆ្នាំ២០២៤ ស្ដីពីធុរៈកិច្ចកម្មសិទ្ធិបញ្ញា នឹងជួយជំរុញការធ្វើពាណិជ្ជភាវូបនីយកម្មកម្មសិទ្ធិបញ្ញា និងពង្រឹងកិច្ចការពារនៃការបង្កើតនវានុវត្តន៍ ការផ្ដល់អាជ្ញាប័ណ្ណកម្មសិទ្ធិបញ្ញារួមជាមួយនឹងការប្រើប្រាស់កម្មសិទ្ធិបញ្ញា។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី០៦ ខែធ្នូ ឆ្នាំ២០២៤។

វេទិកាអាស៊ីឆ្នាំ២០២៤ ដែលរៀបចំឡើងដោយអង្គភាពកម្មសិទ្ធិបញ្ញាតំបន់រដ្ឋបាលពិសេសហុងកុង ប្រទេសចិននេះ មានគោលបំណងចែករំលែកបទពិសោធពីការប្រើប្រាស់កម្មសិទ្ធិបញ្ញា សម្រាប់ធុរៈកិច្ច ដែលធ្វើបទបង្ហាញពីតំណាងក្រុមហ៊ុនធំៗមួយចំនួន និងភ្នាក់ងារចុះបញ្ជីម៉ាក ពិសេសមានការចូលរួមពីប្រទេសដែលជាសមាជិកអាស៊ានផងដែរ។

ក្នុងឱកាសចូលរួមវេទិកាខាងលើ ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធាននាយកដ្ឋានកម្មសិទ្ធិបញ្ញា ក៏បានចូលរួមកិច្ចប្រជុំទ្វេភាគីជាមួយទីប្រឹក្សាប្រធានអង្គភាពកម្មសិទ្ធិបញ្ញាតំបន់រដ្ឋបាលពិសេសហុងកុងចំនួន២រូប គឺលោក Derek Lau និងលោក Joseph Yeung ដើម្បីពិភាក្សាពីការចុះអនុស្សារណៈនៃការយោគយល់គ្នា និងការសិក្សាអំពីផែនការសកម្មភាពការងារលម្អិតឆ្នាំ២០២៥ ក្នុងវិស័យកម្មសិទ្ធិបញ្ញា នៅទីក្រុងហុងកុងផងដែរ៕