ភ្នំពេញ៖ ឯកឧត្តម Andreas Motzfeldt Kravik អនុរដ្ឋមន្ត្រីក្រសួងការបរទេសនៃប្រទេសន័រវែស ប្ដេជ្ញាបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងន័រវែស-កម្ពុជាឱ្យកាន់តែល្អថែមទៀត ជាពិសេសការជំរុញទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរ។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី២៥ ខែវិច្ឆិកា ឆ្នាំ២០២៤។

ក្នុងជំនួបជាមួយ សម្ដេចធិបតីនាយករដ្ឋមន្រ្តី ឯកឧត្តម Andreas Motzfeldt Kravik អបអរសាទរចំពោះកម្ពុជា ដែលបានរៀបចំយ៉ាងល្អនូវកិច្ចប្រជុំកំពូលសៀមរាប-អង្គរ ស្តីពី «ពិភពលោកមួយដែលគ្មានមីន» និងបានលើកឡើងថា កម្ពុជាមានការអភិវឌ្ឍឆាប់រហ័សលើគ្រប់វិស័យ ពិសេសវិស័យបោសសម្អាតមីន និងយុទ្ធភ័ណ្ឌមិនទាន់ផ្ទុះ ដែលជាបទពិសោធដ៏ល្អសម្រាប់បណ្ដាប្រទេសលើពិភពលោក។

តាមការលើកឡើងរបស់សម្តេចធិបតី ហ៊ុន ម៉ាណែត ប្រជាជន និងរដ្ឋាភិបាលន័រវែស បានរួមចំណែកដល់ ការអភិវឌ្ឍសង្គម-សេដ្ឋកិច្ចកម្ពុជា, សកម្មភាពភាពបោសសម្អាតមីន និងការជួយគាំទ្រដល់អង្គជំនុំជម្រះវិសាមញ្ញក្នុងតុលាការកម្ពុជា។ សម្ដេចធិបតី ហ៊ុន ម៉ាណែត និងឯកឧត្តមអនុរដ្ឋមន្ត្រី Andreas Motzfeldt Kravik នាឱកាសនោះ ក៏បានពិភាក្សាគ្នាអំពីបញ្ហាមួយចំនួនក្នុងតំបន់ និងសកលលោកផងដែរ៕