ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) ណែនាំក្រុមហ៊ុនមួយចំនួនរបស់អង់គ្លេសដែលមានសក្ដានុពល សិក្សាលទ្ធភាពបណ្ដាក់ទុនលើវិស័យទទួលបានការលើកទឹកចិត្តនៅកម្ពុជា។ ការណែនាំនេះ ធ្វើឡើងក្នុងកិច្ចប្រជុំតុមូលធុរកិច្ច រវាងកម្ពុជា-អង់គ្លេស នាថ្ងៃទី១១ ខែវិច្ឆិកា ឆ្នាំ២០២៤ នៅចក្រភពអង់គ្លេស។

CDC បានឱ្យដឹងថា កិច្ចប្រជុំតុមូលធុរកិច្ច កម្ពុជា-អង់គ្លេស រៀបចំឡើងដើម្បីអនុញ្ញាតឱ្យភាគីទាំងពីរបានពិភាក្សាផ្លាស់ប្ដូរមតិយោបល់លើកិច្ចការងារវិនិយោគឯកជន និងការផ្សព្វផ្សាយអំពីបរិយាកាសវិនិយោគនៅកម្ពុជា។ ការចូលរួមក្នុងកិច្ចប្រជុំតុមូលធុរកិច្ច កម្ពុជា-អង់គ្លេស នេះ ក៏មានការចូលរួមពីតំណាងរដ្ឋាភិបាលចក្រភពអង់គ្លេស លោក Simon Brown នៃការិយាល័យធុរកិច្ច និងពាណិជ្ជកម្ម ក្រោមការសហការរៀបចំដោយក្រុមហ៊ុន KPMG។

គួរបញ្ជាក់ថា ចក្រភពអង់គ្លេស គឺជាប្រទេសចុងក្រោយក្នុងឆ្នាំ២០២៤ ដែលឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ទៅទស្សនកិច្ចទាក់ទាញ និងជំរុញវិនិយោគ ដើម្បីផ្សព្វផ្សាយសក្ដានុពលរបស់កម្ពុជា បញ្ជ្រាបព័ត៌មានវិជ្ជមានអំពីភាពរីកចម្រើន និងកិច្ចខិតខំរបស់រាជរដ្ឋាភិបាល ពិសេសលើវិស័យវិនិយោគឯកជន ក្នុងទិសដៅស្វែងរកឱកាសបង្កើតការងារដល់ប្រជាពលរដ្ឋ៕