ភ្នំពេញ៖ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បញ្ចុះតម្លៃ២០% សម្រាប់យានយន្តគ្រប់ប្រភេទ រយៈពេល៣ថ្ងៃ ចាប់ពីថ្ងៃទី១៤ ដល់ ១៦ ខែវិច្ឆិកា ឆ្នាំ២០២៤នេះ។ ការជូនដំណឹងរបស់ក្រសួងសាធារណការ និងដឹកជញ្ជូន កាលពីថ្ងៃទី១២ វិច្ឆិកានេះ បានបញ្ជាក់ពីការបញ្ចុះតម្លៃនេះ គឺដើម្បីចូលរួមអបអរសាទរនៅក្នុងឱកាសនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។

សេចក្តីប្រកាសដដែល ក៏បានបញ្ជាក់ពីការបញ្ចុះតម្លៃរហូតដល់ទៅ៤០% និង៦០% ផងដែរ សម្រាប់យានយន្តដឹកទំនិញធុនធ្ងន់ដែលមានទម្ងន់ផ្ទុកលើសពី១០តោនឡើងទៅ។ ចំពោះការបញ្ចុះតម្លៃ៤០% គឺយានយន្តដឹកទំនិញបើកបរចាប់ពីម៉ោង៨ព្រឹក ដល់ម៉ោង៨យប់ និងបញ្ចុះតម្លៃរហូតដល់៦០% គឺសម្រាប់យានយន្តដឹកទំនិញបើកបរចាប់ពីម៉ោង៨យប់ ដល់ម៉ោង៨ព្រឹកវិញ។

ទន្ទឹមនឹងការជូនដំណឹងនេះ ក្រសួងសាធារណការ និងដឹកជញ្ជូន ក៏បានអំពាវនាវដល់សាធារណជន និង អ្នកប្រើប្រាស់ផ្លូវទាំងអស់ សូមបើកបរដោយការប្រុងប្រយ័ត្នខ្ពស់ និងចូលរួមគោរពច្បាប់ចរាចរណ៍ទាំងអស់គ្នា ដើម្បីរក្សាអាយុជីវិត និងកាត់បន្ថយគ្រោះថ្នាក់ចរាចរណ៍ឱ្យបានជាអតិបរមា៕