ភ្នំពេញ៖ សម្តេចធិបតី ហ៊ុន ម៉ាណែត នឹងចូលរួមកិច្ចប្រជុំកំពូលចំនួន៣ មានកិច្ចប្រជុំកំពូលមហាអនុតំបន់មេគង្គ(GMS) លើកទី៨, កិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ (អេកម៉ិក-ACMECS) លើកទី១០ និងកិច្ចប្រជុំកំពូលកិច្ចសហប្រតិបត្តិការកម្ពុជា-ឡាវ-មីយ៉ាន់ម៉ា-វៀតណាម (CLMV) លើក១១ នៅទីក្រុងគុនមិញ ខេត្តយូណាន ប្រទេសចិន។

ក្នុងកិច្ចប្រជុំកំពូលខាងលើ នឹងមានការពិនិត្យសមិទ្ធិផលដែលសម្រេចបាន និងកំណត់ទិសដៅអនាគតសម្រាប់ពង្រីកកិច្ចសហប្រតិបត្តិការ បង្កើនទំនុកចិត្ត ពង្រឹងភាពជាដៃគូក្នុងចំណោមបណ្តាប្រទេសសមាជិក ដើម្បីរួមចំណែកអភិវឌ្ឍន៍សង្គម-សេដ្ឋកិច្ច និងការលើកកម្ពស់សុខុមាលភាពរបស់ប្រជាជនក្នុងតំបន់។ ជាមួយគ្នានេះ អត្ថប្រយោជន៍នៃកិច្ចប្រជុំនេះ គឺការបង្ហាញពីសារសំខាន់នៃសន្តិភាព និងការអភិវឌ្ឍប្រកបដោយចីរភាព ក៏ដូចជាការរួមរស់ដោយសន្តិសហវិជ្ជមាន ក្នុងចំណោមប្រទេសសមាជិក។

កិច្ចប្រជុំ ដែលនឹងប្រព្រឹត្តទៅ នាថ្ងៃទី៦-៧ ខែវិច្ឆិកា ឆ្នាំ២០២៤ នឹងប្រព្រឹត្តឡើងក្រោមមូលបទ «ឆ្ពោះទៅកាន់សហគមន៍កាន់តែប្រសើរឡើង តាមរយៈការអភិវឌ្ឍដែលជំរុញដោយនវានុវត្តន៍», «ឆ្ពោះទៅកាន់ការតភ្ជាប់ដោយរលូនសម្រាប់សមាហរណកម្មអនុតំបន់មេគង្គ» និង «មិត្តភាព និងសាមគ្គីភាពសម្រាប់សហគមន៍ប្រកបដោយភាពធន់ និងវិបុលភាព»។ ក្រៅពីកិច្ចប្រជុំទាំង៣ ក្នុងអំឡុងពេលស្នាក់នៅទីក្រុងគុនមិញ សម្តេចធិបតីនាយករដ្ឋមន្រ្តី នឹងមានជំនួបទ្វេភាគី ជាមួយថ្នាក់ដឹកនាំ និងធុរជនបរទេសផងដែរ៕