ភ្នំពេញ៖ ធនាគារអភិវឌ្ឍន៍ជនបទ និងកសិកម្ម (ARDB) និងក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ និងគណៈកម្មាធិការជាតិជំរុញចលនាភូមិមួយផលិតផលមួយ បានចុះហត្ថលេខាលើអនុស្សារណៈយោគយល់គ្នា (MOU)។ កិច្ចសហការនេះ មានគោលបំណងអភិវឌ្ឍន៍វិស័យកសិកម្ម និងជនបទ និងការជំរុញចលនាភូមិមួយផលិតផលមួយ ដើម្បីលើកកម្ពស់ជីវភាពពលរដ្ឋ និងកាត់បន្ថយភាពក្រីក្រ។

ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានលើកឡើងថា កិច្ចសហប្រតិបត្តិការរវាងស្ថាប័នរដ្ឋពីរ នឹងគាំទ្រគោលនយោបាយរបស់រាជរដ្ឋាភិបាលឱ្យកាន់តែមានប្រសិទ្ធភាពខ្ពស់ក្នុងវិស័យកសិកម្ម និងអភិវឌ្ឍន៍ជនបទ។ លើសពីនេះ ក្នុងនាមជាធនាគារបម្រើគោលនយោបាយរបស់រាជរដ្ឋាភិបាល ធនាគារ ARDB បាននិងកំពុងបំពេញបេសកកម្មផ្តល់ហិរញ្ញប្បទានដល់តួអង្គក្នុងខ្សែច្រវ៉ាក់តម្លៃកសិកម្ម គាំទ្រការអភិវឌ្ឍសេដ្ឋកិច្ចជនបទ និងកំពុងឆ្ពោះទៅរកទស្សនប្រែក្លាយជាធនាគារមានចីរភាព (Sustainable bank) ផងដែរ។

តាមរយៈការចុះ MOU កាលពីថ្ងៃទី២៤ ខែតុលា ឆ្នាំ២០២៤ ភាគីទាំងពីរនឹងសហការសម្របសម្រួលផ្តោតលើការអភិវឌ្ឍសេដ្ឋកិច្ចបៃតង និងសេដ្ឋកិច្ចក្រៅប្រព័ន្ធផងដែរ។ ការចុះអនុស្សារណៈយោគយល់គ្នានេះ បានធ្វើឡើងក្រោមអធិបតីភាព ឯកឧត្តមបណ្ឌិតសភាចារ្យ ទេសរដ្ឋមន្ត្រី អ៊ុក រ៉ាប៊ុន ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិជំរុញចលនាភូមិមួយផលិតផលមួយ និងឯកឧត្តមបណ្ឌិត កៅ ថាច៕