ភ្នំពេញ៖ ក្រុមប្រឹក្សាធុរកិច្ចចក្រភពអង់គ្លេស-អាស៊ាន នឹងជួយផ្សព្វផ្សាយឱកាសវិនិយោគ និងជំរុញកម្ពុជា ឱ្យក្លាយជាទិសដៅវិនិយោគរបស់វិនិយោគិន និងធុរជនអង់គ្លេស។ នៅក្នុងជំនួបជាមួយឯកឧត្តម អេត វ៉ាយហ៊្សេ ប្រធានក្រុមប្រឹក្សាធុរកិច្ចចក្រភពអង់គ្លេស-អាស៊ាន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានលើកទឹកចិត្តឱ្យធុរជនអង់គ្លេសស្វែងរកកាលានុវត្តភាពនៅកម្ពុជា។

ក្នុងជំនួបនេះ ឯកឧត្តម អេត វ៉ាយហ៊្សេ ក៏បានលើកឡើងថា ក្រុមប្រឹក្សាធុរកិច្ចចក្រភពអង់គ្លេសអាស៊ាន នឹងលើកកម្ពស់ទំនាក់ទំនងសេដ្ឋកិច្ចជាមួយកម្ពុជា ក្នុងការជំរុញភាពជាដៃគូសេដ្ឋកិច្ច។ ឯកឧត្តម អេត វ៉ាយហ៊្សេ បន្តថា ក្រុមប្រឹក្សាធុរកិច្ចចក្រភពអង់គ្លេសអាស៊ាន នឹងបន្តសហការជាមួយសភាពាណិជ្ជកម្មកម្ពុជា ដើម្បីទាញយកប្រយោជន៍ជាអតិបរមាពីកាលានុវត្តភាពកម្ពុជាផងដែរ។

នាឱកាសនោះ អ្នកឧកញ៉ា គិត ម៉េង ក៏បានគូសបញ្ជាក់ពីការជំរុញពាណិជ្ជកម្ម និងវិនិយោគរវាងកម្ពុជា និងចក្រភពអង់គ្លេស ថា កម្ពុជា មានទីផ្សារទូលំទូលាយ មានកម្លាំងពលកម្មវ័យក្មេង និងមានទីតាំងភូមិសាស្ត្រជាយុទ្ធសាស្ត្រនៅចំកណ្តាលអាស៊ាន ដែលមានប្រជាជនសរុបជាង ៦៨០លាននាក់។

តាមការចុះផ្សាយរបស់សភាពាណិជ្ជកម្មកម្ពុជា នាថ្ងៃទី០៩ តុលា សភាពាណិជ្ជកម្មកម្ពុជា និងក្រុមប្រឹក្សាធុរកិច្ចចក្រភពអង់គ្លេស-អាស៊ាន ក៏បានឯកភាព សម្របសម្រួលតភ្ជាប់ទំនាក់ទំនងធុរកិច្ចរវាងកម្ពុជា និងអង់គ្លេស, ជំរុញបរិយាកាសវិនិយោគល្អប្រសើរនៅកម្ពុជា, ជំរុញកិច្ចសហប្រតិបត្តិការកម្រិតអាស៊ាន និងពហុភាគី៕