ភ្នំពេញ៖ ក្រសួងរ៉ែ និងថាមពល ជំរុញឱ្យមានការធ្វើអាជីវកម្មរ៉ែដោយស្របច្បាប់ ដើម្បីនាំមកនូវផលប្រយោជន៍ជាតិ ដូចជាបង្កើតឱកាសការងារនៅនឹងកន្លែង និងប្រយោល និងរួមចំណែកដល់ការបង្កើតប្រភពចំណូលថវិកាជាតិបន្ថែមទៀត។ នេះបើតាមការចុះផ្សាយរបស់ក្រសួងរ៉ែ នាថ្ងៃទី៥ ខែតុលា ឆ្នាំ២០២៤។

ក្រៅពីការបង្កើនចំណូលជាតិ ការធ្វើអាជីវកម្មរ៉ែស្របច្បាប់ នឹងចូលរួមបំបាត់នូវផលប៉ះពាល់ធ្ងន់ធ្ងរដល់បរិស្ថាននិងសង្គម ព្រមទាំងចូលរួមចំណែកអភិវឌ្ឍន៍សហគមមូលដ្ឋានតាមរយៈការធ្វើអាជីវកម្មរ៉ែប្រកបដោយចីរភាពផងដែរ។ ពាក់ព័ន្ធនឹងសកម្មភាពរ៉ែអនាធិបតេយ្យដែលត្រូវបានលុបបំបាត់ជាបន្តបន្ទាប់នេះ ក្រសួងរ៉ែ បានអំពាវនាវឱ្យពលរដ្ឋដែលកំពុងធ្វើអាជីវកម្មរ៉ែខុសច្បាប់ បញ្ឈប់នូវរាល់សកម្មភាពទាំងនេះ។

ក្រសួងរ៉ែ និងថាមពល លើកទឹកចិត្តឱ្យគ្រប់ភាគីពាក់ព័ន្ធចូលរួមការអនុវត្តច្បាប់និងទប់ស្កាត់បទល្មើសអាជីវកម្មរ៉ែខុសច្បាប់ តាមរយៈការជូនដំណឹងអំពីសកម្មភាពរ៉ែអនាធិបតេយ្យមកក្រសួងរ៉ែ តាមលេខទូរសព្ទ ០៩៥ ៧២៧ ៧២៧៕