ភ្នំពេញ៖ រដ្ឋាភិបាល ទទួលចំណូលពីការលក់សំបុត្រឱ្យភ្ញៀវអន្តរជាតិចូលទស្សនារមណីយដ្ឋានអង្គរបាន ៣២ ៥២២ ៧៣០ដុល្លារ ក្នុងរយៈពេល ៩ខែ ឆ្នាំ២០២៤។ សេចក្តីប្រកាសព័ត៌មានរបស់គ្រឹះស្ថានអង្គរ នាខែតុលា ឆ្នាំ២០២៤ បញ្ជាក់ថា ចំនួននេះមានការកើនឡើង៣០,៣២% ធៀបនឹងរយៈពេលដូចគ្នា ក្នុងឆ្នាំ២០២៣។

តាមសេចក្តីប្រកាសព័ត៌មាន ស្តីពីស្ថិតិភ្ញៀវបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្មៀស ប្រចាំខែកញ្ញា ឆ្នាំ២០២៤ ក្នុងរយៈពេល ៩ខែ រមណីយដ្ឋានអង្គរ ទទួលបានភ្ញៀវអន្តរជាតិសរុប ៦៩៩ ៨៥០នាក់ កើនឡើង២៩,៧១% ធៀបនឹងរយៈពេលដូចគ្នា ឆ្នាំ២០២៣។ ចំណែកឯ ការលក់បណ្ណនៅប្រាសាទកោះកែរ ក្នុងរយៈពេល ៩ខែនេះ ទទួលបានចំណូល ២០៨ ០៥០ដុល្លារ ពីទេសចរអន្តរជាតិចំនួន ១៣ ៨៧០នាក់។

ការលក់សំបុត្រទូកវិញ រដ្ឋាភិបាលទទួលបានចំណូល ៥៥៣ ៤៥៣ដុល្លារ ដែលមានទូកសរុបចំនួន២០ ៦៩៧ ក្នុងនោះទូកតូចចំនួន ១៤ ៥១២ ទូកកណ្តាល៥ ៤៩៧ និងទូកធំចំនួន៦៨៨។ គួរជម្រាបថា ក្នុងខែកញ្ញា ឆ្នាំ២០២៤ មានភ្ញៀវបរទេសចូលទស្សនារមណីយដ្ឋានអង្គរមានចំនួន ៤៧ ៩៩៣នាក់ កើនឡើង១៦, ៩២% ធៀបនឹងខែកញ្ញា ឆ្នាំ២០២៣ និងរកចំណូលបាន ២ ១៨៨ ៥០១ដុល្លារ កើនឡើង ១៧,៤៤% ធៀបនឹងខែកញ្ញា ឆ្នាំ២០២៣៕