ភ្នំពេញ៖ រយៈពេល ៨ខែ នៃឆ្នាំ២០២៤ កម្ពុជា សម្រេចទំហំពាណិជ្ជកម្មបានជាង ៣៦,៤៨ពាន់លានដុល្លារ កើនឡើងបាន ១៦,៥% បើធៀបនឹងរយៈពេល ៨ខែក្នុងឆ្នាំ២០២៣ មានចំនួន ៣១,៣២ពាន់លានដុល្លារ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ចេញផ្សាយនាថ្ងៃទី១០ ខែកញ្ញា ឆ្នាំ២០២៤។

ក្នុងទំហំពាណិជ្ជកម្មជាង ៣៦,៤៨ពាន់លានដុល្លារនេះ កម្ពុជា សម្រេចបានការនាំចេញទៅទីផ្សារអន្តរជាតិជាង ១៧,៥៨ពាន់លានដុល្លារ កើនឡើងបាន១៦,៧% ខណៈដែលការនាំចូលមានចំនួនជិត ១៩ពាន់លានដុល្លារ កើនឡើងបាន ១៦,២% បើធៀបនឹងរយៈពេលដូចគ្នាក្នុងឆ្នាំ២០២៣។

អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ប្រទេសដែលកម្ពុជាសម្រេចការនាំចេញ និងនាំចូលបានច្រើនជាងគេ រួមមាន៖ ប្រទេសចិន សម្រេចបាន ១០,០៧ពាន់លានដុល្លារ, សហរដ្ឋអាម៉េរិក សម្រេចបានទំហំជិត ៧ពាន់លានដុល្លារ, ប្រទេសវៀតណាម សម្រេចបាន ៥,២៣ពាន់លានដុល្លារ, ប្រទេសថៃ កម្ពុជាសម្រេចបាន ២,៧៨ពាន់លានដុល្លារ និងប្រទេសជាច្រើនផ្សេងទៀត។

គួរបញ្ជាក់ថា ទំនិញដែលកម្ពុជា នាំចេញមានដូចជា សម្លៀកបំពាក់ គ្រឿងបន្ទាប់បន្សំដែលធ្វើពីក្រណាត់ ធញ្ញជាតិ ឈើ និងវត្ថុធ្វើពីឈើ ធ្យូងឈើ បន្លែដែលអាចបរិភោគបាន ស្បែកជើង ស្រោមជើង និងផលិតផលផ្សេងៗទៀត។ ចំណែក ទំនិញ ដែលកម្ពុជានាំចូល រួមមាន៖ រ៉ែប្រើជាគ្រឿងចំហេះ ប្រេងខនិជ ផលិតផលពីការចម្រាញ់ ផលិតផលពីការចាក់ដោយម្ជុល កប្បាស ដែក និងផលិតផលមួយចំនួនផ្សេងទៀត៕