ភ្នំពេញ៖ ក្រសួងទេសចរណ៍ នឹងចូលរួមពិព័រណ៍ទេសចរណ៍អន្តរជាតិ Tourism EXPO Japan 2024 នៅទីក្រុងតូក្យូ ប្រទេសជប៉ុន រយៈពេល ៧ថ្ងៃ ចាប់ពីថ្ងៃទី២៤-៣០ ខែកញ្ញា ឆ្នាំ២០២៤ ក្នុងគោលដៅផ្សព្វផ្សាយពីសក្តានុពលវិស័យទេសចរណ៍ និងទាក់ទាញភ្ញៀវទេសចរអន្តរជាតិមកកម្ពុជា។ ការចូលរួមក្នុងពិព័រណ៍អន្តរជាតិនេះ ក៏ដើម្បីពង្រីកទំនាក់ទំនង និងកិច្ចសហប្រតិបត្តិការក្នុងវិស័យទេសចរណ៍រវាងផ្នែករដ្ឋ-ឯកជនកម្ពុជា ជប៉ុន និងអន្តរជាតិផងដែរ។

ការចូលរួមផ្សព្វផ្សាយពីកម្ពុជានេះ គឺស្របតាមគំនិតយុទ្ធសាស្ត្រ «បង្កើន៥ អភិវឌ្ឍន៍៣» របស់ក្រសួងទេសចរណ៍ ព្រមទាំងចូលរួមជំរុញយុទ្ធនាការ «ទស្សនាសៀមរាប ឆ្នាំ២០២៤» សំដៅដល់ការទាក់ទាញទេសចរណ៍មកកាន់កម្ពុជាកាន់តែច្រើនបន្ថែមទៀត។ នេះបើតាមសេចក្តីជូនដំណឹង ស្តីពីការចូលរួមពិព័រណ៍ទេសចរណ៍អន្តរជាតិ Tourism EXPO Japan 2024 នៅទីក្រុងតូក្យូ ប្រទេសជប៉ុន ចាប់ពីថ្ងៃទី២៤-៣០ ខែកញ្ញា ឆ្នាំ២០២៤ របស់ក្រសួងទេសចរណ៍។

ទាក់ទងនឹងព្រឹត្តិការណ៍ខាងលើ ក្រសួងទេសចរណ៍ បានជំរុញឱ្យប្រតិបត្តិករទេសចរណ៍ សមាគមទេសចរណ៍ និងដៃគូពាក់ព័ន្ធ ចូលរួមឱ្យបានច្រើន ក្នុងទិសដៅជំរុញការផ្សព្វផ្សាយពីកម្ពុជាឱ្យកាន់តែទូលំទូលាយ។ លើសពីនេះ ការបានចូលរួមក្នុងពិព័រណ៍ទេសចរណ៍របស់ភាគីពាក់ព័ន្ធ គឺដើម្បីគ្រោងរៀបចំកញ្ចប់សេវាកម្មទេសចរណ៍ផ្សេងៗសម្រាប់ទីផ្សារទេសចរណ៍ជប៉ុន ដែលជាទីផ្សារទេសចរណ៍ធំមួយក្នុងចំណោមទីផ្សារទេសចរណ៍សំខាន់ៗទាំង១០ របស់កម្ពុជាទៀតផង៕