ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានចាប់អារម្មណ៍ និងពិនិត្យឱកាសចូលរួមជាសមាជិកសហភាពអន្តរជាតិសម្រាប់ការការពារពូជរុក្ខជាតិថ្មី (UPOV) ដើម្បីទទួលបានសិទ្ធិក្នុងការចុះបញ្ជីការពារប្រភេទពូជដំណាំថ្មីៗ ខណៈកម្ពុជាបន្តបង្កើតពូជថ្មីៗជាច្រើនដែលមានគុណភាពល្អផងដែរ។ ឯកឧត្តម ឌិត ទីណា លើកឡើងដូច្នេះក្នុងគ្រាជួបសម្តែងការគួរសមជាមួយលោកស្រី Yolanda Huerta Casado អគ្គលេខាធិការរងនៃ UPOV។

ក្នុងជំនួប កាលពីថ្ងៃទី២៦ ខែសីហា ឆ្នាំ២០២៤ ឯកឧត្តមរដ្ឋមន្រ្តីក្រសួងកសិកម្ម បានឱ្យដឹងថា ការចូលជាសមាជិក UPOV នឹងបង្កើនភាពជឿជាក់ដល់អ្នកវិនិយោគក្នុងការស្រាវជ្រាវប្រភេទពូជ និងបច្ចេកទេសពូជ និងលើកទឹកចិត្តអ្នកស្រាវជ្រាវប្រភេទពូជដំណាំទូទាំងពិភពលោក អាចផ្លាស់ប្តូរបទពិសោធរវាងគ្នាទៅវិញទៅមក។

គួរបញ្ជាក់ថា សហភាពអន្តរជាតិសម្រាប់ការការពារពូជរុក្ខជាតិថ្មី (UPOV) គឺជាអង្គការអន្តររដ្ឋាភិបាលដែលមានទីស្នាក់ការកណ្តាលនៅទីក្រុងហ្សឺណែវ ប្រទេសស្វីស និងមានបំណងគាំទ្រ និងជំរុញការស្រាវជ្រាវនិងអភិវឌ្ឍន៍ប្រភេទពូជថ្មីនៃដំណាំសម្រាប់បម្រើផលប្រយោជន៍សង្គម។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី២៦ ខែសីហា ឆ្នាំ២០២៤៕