ភ្នំពេញ៖ ក្រុមហ៊ុន Inspur Group Co., Ltd. ដែលជាសហគ្រាសរដ្ឋរបស់ប្រទេសចិន កំពុងស្វែងយល់ពីលទ្ធភាពបណ្ដាក់ទុនវិនិយោគនៅកម្ពុជាលើវិស័យបច្ចេកវិទ្យាឌីជីថល ដើម្បីរួមចំណែកការធ្វើបរិវត្តកម្មឌីជីថល ក្នុងការកសាងសេដ្ឋកិច្ច និងសង្គមឌីជីថល ពិសេសដើម្បីជំរុញសន្ទុះកំណើនសេដ្ឋកិច្ចនៃសង្គមឌីជីថលកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី២៣ ខែសីហា ឆ្នាំ២០២៤។

ក្នុងជំនួបពិភាក្សាជាមួយលោក Ray Liu ប្រធានក្រុមហ៊ុន Inspur Group ឯកឧត្ដម សួន សុផល អគ្គលេខាធិការរងគណៈកម្មាធិការវិនិយោគកម្ពុជា ក៏បានលើកឡើងអំពីភាពទាក់ទាញដល់ការធ្វើធុរកិច្ចនៅកម្ពុជាតាមរយៈកិច្ចសម្រួលវិនិយោគ កញ្ចប់លើកទឹកចិត្ត និងការថែទាំវិនិយោគ ស្របតាមច្បាប់ស្ដីពីវិនិយោគកម្ពុជា។ ឯកឧត្ដម សួន សុផល បានបង្ហាញអំពីលទ្ធភាពគាំទ្រដល់ការបន្ស៊ីគ្នានូវគម្រោងសិក្សាស្រាវជ្រាវអភិវឌ្ឍន៍របៀងឧស្សាហកម្ម និងបច្ចេកវិទ្យា ដែលស្របតាមស្មារតីនៃអនុស្សរណៈការយោគយល់គ្នាស្តីពីយន្តការការងារចម្រុះលើការកសាងរបៀងអភិវឌ្ឍន៍ឧស្សាហកម្ម។

នាឱកាសនោះ ឯកឧត្ដម សួន សុផល ក៏បានលើកទឹកចិត្តឱ្យក្រុមហ៊ុន បន្តសហការជាមួយភាគីពាក់ព័ន្ធ ដើម្បីជំរុញឱ្យគម្រោងខាងលើទទួលបានជោគជ័យផងដែរ។ ជំនួបពិភាក្សារវាងឯកឧត្ដម សួន សុផល និងលោក Ray Liu គឺក្នុងគោលបំណងស្វែងយល់ពីសក្ដានុពល និងកាលានុវត្តភាពវិនិយោគនៅកម្ពុជា៕