ភ្នំពេញ៖ តាមបទពិសោធរបស់បណ្តាប្រទេសមួយចំនួននៅលើពិភពលោក ការកសាងរដ្ឋាភិបាលឌីជីថលមួយឱ្យមានមុខងារពេញលេញ គឺត្រូវឈរលើគោលការណ៍អនុវត្តជាមូលដ្ឋានចំនួន៣ រួមមាន៖ គោលការណ៍តែមួយលើក, គោលការណ៍អន្តរប្រតិបត្តិការជាប្រព័ន្ធអេកូឡូស៊ីតែមួយ និងគោលការណ៍ចាប់ផ្តើមនិងពង្រីកដើម្បីប្រសិទ្ធផល។

យោងតាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ គោលការណ៍តែមួយលើក(The once-Only Principle) ជាគោលការណ៍អភិវឌ្ឍន៍ប្រព័ន្ធព័ត៌មានឌីជីថល ដែលតម្រូវឱ្យក្រសួងស្ថាប័ន នីតិបុគ្គល និងប្រជាពលរដ្ឋផ្តល់ទិន្នន័យតែមួយលើកដល់អាជ្ញាធរមានសមត្ថកិច្ច ដោយមិនស្នើសុំឬតម្រូវឱ្យផ្តល់ទិន្នន័យដដែលច្រើនលើកទេ។ គោលការណ៍នេះ នឹងជួយកាត់បន្ថយការបញ្ជូលទិន្នន័យដែលគ្មានសង្គតិភាព ចំណាយរដ្ឋបាល និងបន្ទុកការងាររបស់អាជ្ញាធរមានសមត្ថកិច្ច និងភាគីពាក់ព័ន្ធក្នុងការប្រមូលរក្សាទុកនិងប្រើប្រាស់ទិន្នន័យ។

ចំពោះ គោលការណ៍អន្តរប្រតិបត្តិការជាប្រព័ន្ធអេកូឡូស៊ីតែមួយ (Interoperability as an Ecosystem Principle) ជាគោលការណ៍ដែលធានាថា គ្រប់ប្រព័ន្ធព័ត៌មានឌីជីថលទាំងអស់របស់រដ្ឋាភិបាល អាចមានប្រតិបត្តិការឯករាជ្យ និងអាចធ្វើប្រតិបត្តិការជាមួយគ្នាដោយសុវតិ្ថភាពជាមួយប្រព័ន្ធដទៃទៀត ដែលជាប្រព័ន្ធអេកូឡូស៊ីមួយ ដើម្បីបំពេញមុខងារឱ្យគ្នាទៅវិញទៅមកក្នុងការបម្រើសេវាសារធារណៈឱ្យមានប្រសិទ្ធភាព។ ក្នុងន័យនេះ ប្រព័ន្ធព័ត៌មានឌីជីថលដែលប្រើប្រាស់ដោយក្រសួងស្ថាប័ន ត្រូវមានអន្តរប្រតិបត្តិការ និងការផ្លាស់ប្តូរទិន្នន័យទៅវិញទៅមកផងដែរ។

លើសពីនេះ គោលការណ៍អន្តរប្រតិបត្តិការជាប្រព័ន្ធអេកូឡូស៊ីតែមួយនេះ នឹងអនុញ្ញាតឱ្យប្រព័ន្ធព័ត៌មានឌីជីថលរបស់រដ្ឋាភិបាល អាចធ្វើអន្តរប្រតិបត្តិការនិងផ្លាស់ប្តូរទិន្នន័យជាមួយប្រព័ន្ធព័ត៌មានឌីជីថលវិស័យឯកជន ដើម្បីជំរុញនវានុវត្តន៍និងអភិបាលកិច្ចទិន្នន័យ សំដៅបង្កើនប្រសិទ្ធភាពប្រតិបត្តិការអាជីវកម្មរបស់វិស័យឯកជន។

ដោយឡែក គោលការណ៍ចាប់ផ្តើមនិងពង្រីកដើម្បីប្រសិទ្ធផល (Land and Expand for Efficiency Principle) គឺជាគោលការណ៍ដែលបើកលទ្ធភាពឱ្យក្រសួងស្ថាប័ន ផ្តួចផ្តើមរៀបចំអភិវឌ្ឍន៍ប្រព័ន្ធព័ត៌មានឌីជីថល ដោយចាប់ផ្តើមពីតូចនិងពង្រីកទៅធំ សម្រាប់បំពេញតម្រូវការក្នុងការគ្រប់គ្រងនិងផ្តល់សេវាសាធារណៈប្រកបដោយប្រសិទ្ធផល ដោយឈរលើមូលដ្ឋាននិងក្របខ័ណ្ឌកំណត់ជាក់លាក់មួយ និងស្របតាមគោលការណ៍ទាំង២ ខាងលើ។

ចំពោះការផ្តួចផ្តើមរៀបចំប្រព័ន្ធព័ត៌មានឌីជីថល ក្នុងគោលការណ៍ចាប់ផ្តើមនិងពង្រីកដើម្បីប្រសិទ្ធផល គឺត្រូវផ្តោតលើចំណុចអាទិភាពចាំបាច់និងប្រសិទ្ធផលជាគន្លឹះ ទើបអាចពង្រីកវិសាលភាពតាមរយៈការប្រើប្រាស់សមាសធាតុដែលមានស្រាប់(Reusability) ឬពង្រីកបន្ថែម ដើម្បីចែករំលែកការប្រើប្រាស់ជាមួយប្រព័ន្ធផ្សេងៗដោយប្រសិទ្ធផលនិងសន្តិសុខ នៃប្រព័ន្ធទាំងមូល៕