ភ្នំពេញ៖ កម្ពុជា-ម៉ាកាវ នឹងពិនិត្យលទ្ធភាពលើការចុះអនុស្សរណៈនៃការយោគយល់គ្នា ក្នុងការនាំយកផលិតផលកសិផលរបស់កម្ពុជាទៅកាន់ទីផ្សាររបស់ទីក្រុងម៉ាកាវ។ នេះបើតាមការចុះផ្សាយរបស់ក្រសួងពាណិជ្ជកម្មនាថ្ងៃទី២៣ ខែសីហា ឆ្នាំ២០២៤។

ក្នុងជំនួបនាថ្ងៃទី២២ សីហា ឯកឧត្តម លឹម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម និងលោក LEI KIT HENG អគ្គនាយកនៃសមាគមសហព័ន្ធអ្នកផ្គត់ផ្គង់ម៉ាកាវ (MUSA) ក៏បានពិភាក្សាអំពីកិច្ចសហការជាមួយនឹងសមាគមសហព័ន្ធអ្នកផ្គត់ផ្គង់ម៉ាកាវ ក្នុងការនាំយកទំនិញរបស់កម្ពុជាទៅកាន់ផ្សារលក់ទំនិញ និងផ្សារទំនើបធំៗនៅទីក្រុងម៉ាកាវផងដែរ។

គួរបញ្ជាក់ថា សមាគមសហព័ន្ធអ្នកផ្គត់ផ្គង់ម៉ាកាវដែលនៅប្រទេសចិន គឺមានក្រុមហ៊ុនជាង២៥០ ដែលធ្វើអាជីវកម្មលើផ្សារទំនើប ភោជនីយដ្ឋាន សណ្ឋាគារ និងរមណីយដ្ឋានផងដែរ៕