ភ្នំពេញ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ ផ្តល់ឱកាសការងារចំនួន ៥៤ ៦៨៦កន្លែង ដល់សិស្ស និស្សិត និងសាធារណជនដែលកំពុងស្វែងរកការងារធ្វើ។ តាមការចុះផ្សាយរបស់ក្រសួងការងារ នាថ្ងៃទី១៩ ខែសីហា ឆ្នាំ២០២៤ បានឱ្យដឹងថា ឱកាសការងារជាង ៥៤ពាន់កន្លែង គឺផ្តល់ឱ្យក្នុងវិស័យចំនួន៣ រួមមាន៖ វិស័យឧស្សាហកម្ម សេវាកម្ម និងកសិកម្ម។

ក្រសួងការងារ បញ្ជាក់ថា ឱកាសការងារដែលនឹងផ្តល់ឱ្យចាប់ពីថ្ងៃទី១៩ ដល់ ២៥ ខែសីហា ឆ្នាំ២០២៤ គឺមានវិស័យឧស្សាហកម្មចំនួន ៤២ ០១៩កន្លែង, វិស័យសេវាកម្ម ត្រូវការចំនួន ៥ ២៣៧កន្លែង និងវិស័យកសិកម្មចំនួន ៧ ៤៣០កន្លែង។ ការបង្កើតការងារដល់ពលរដ្ឋ តាមរយៈទីភ្នាក់ងារជាតិមុខរបរ គឺស្របតាមយុទ្ធសាស្ត្របញ្ចកោណ-ដំណាក់កាលទី១ ស្ដីពីការអភិវឌ្ឍទីផ្សារការងារ តាមរយៈការបង្កើត ការរក្សា ការបង្កើនការងារដល់កម្មករ-និយោជិត ទាំងក្នុងប្រព័ន្ធ និងក្រៅប្រព័ន្ធ សំដៅបង្កើនប្រាក់ចំណូល ទ្រទ្រង់ជីវភាពសមរម្យ និងកាត់បន្ថយភាពក្រីក្ររបស់ប្រជាជន។

ចំពោះយុវជន សិស្ស និស្សិត និងសាធារណជនដែលមានបំណងស្វែងរកការងារធ្វើ អាចទាក់ទងមកកាន់ទីភ្នាក់ងារជាតិមុខរបរ និងការងារ នៃក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទូរសព្ទ ១២៩៧ ឬ ១២៨៦ ឬ CoolApp លេខ ០៧៧ ២៣ ២៣ ៧៨ ដើម្បីចុះឈ្មោះ និងសម្ភាសភ្លាមៗ៕