ភ្នំពេញ៖ រយៈពេល៣ថ្ងៃ នៃពិធីបុណ្យភ្ជុំបិណ្ឌ មានអ្នកទេសចរជាតិ និងអន្តរជាតិជិត២លាននាក់ ធ្វើដំណើរកម្សាន្តទៅតាមគោលដៅទេសចរណ៍នៅទូទាំងប្រទេស។ បើតាមនាយកដ្ឋានស្ថិតិទេសចរណ៍ និងមន្ទីរទេសចរណ៍រាជធានី-ខេត្ត នៅថ្ងៃទី១៧ តុលានេះ ទេសចរណ៍ជាតិមានប្រមាណ ១,៨៩លាននាក់ កើនជាង ៥២% ធៀបនឹងឆ្នាំ២០២២ ខណៈដែលទេសចរណ៍អន្តរជាតិមានប្រមាណ កើនរហូតដល់២,៧ម៉ឺននាក់ កើនជាង៩០% ធៀបនឹងឆ្នាំ២០២២។

ស្ថិតិទេសចរផ្ទៃក្នុងសរុបទាំងប្រមាណ ១,៩២លាននាក់ នៅទូទាំងរាជធានី-ខេត្តនោះ ត្រូវបានរាប់បញ្ចូលជាចំនួនទេសចរជាតិ និងចំនួនប្រជាពលរដ្ឋដែលបានធ្វើដំណើរកម្សាន្ត នៅតាមរមណីយដ្ឋាន និងគោលដៅទេសចរណ៍ទូទាំងប្រទេស ព្រមជាមួយប្រជាពលរដ្ឋ ដែលលេងកម្សាន្តនៅតាមភូមិស្រុក និងតាមទីតាំងរៀបចំកម្មវិធីនានាផងដែរ។

តំបន់ទេសចរណ៍គោលដៅធំៗ ដែលត្រូវបានបែងចែកសម្រាប់ភ្ញៀវទេសចរណ៍ និងប្រជាពលរដ្ឋនធ្វើដំណើតកម្សាន្តក្នុងរយៈពេល៣ ចាប់ពីថ្ងៃទី១៣-១៥ ខែតុលា ឆ្នាំ២០២៣ នាឱកាសឈប់សម្រាកពិធីបុណ្យភ្ជំបិណ្ឌនោះ រួមមានតំបន់វប្បធម៌, តំបន់ឆ្នេរ, តំបន់អេកូទេសចរណ៍, តំបន់បាត់ដំបង និងតំបន់ផ្សេងៗ។

នៅរាជធានីភ្នំពេញមានអ្នកទេសចរជាង៧,៥ពាន់នាក់ និងអន្តរជាតិជិត៦ពាន់នាក់ផងដែរ។ សម្រាប់តំបន់វប្បធម៌ មានខេត្តកំពង់ធំ, ឧត្តមានជ័យ, ព្រះវិហារ និងខេត្តសៀមរាប មានអ្នកទេសចរជាតិជាង២០ម៉ឺននាក់ និងអន្តរជាតិ ៧ពាន់នាក់។ ចំណែក តំបន់ឆ្នេរ មានខេត្តព្រះសីហនុ, កំពត, កែប និងខេត្តកោះកុង មានអ្នកទេសចរជាតិជិត៣៦ម៉ឺននាក់ និងអន្តរជាតិជាង៧ពាន់នាក់។ ចំពោះ នៅតំបន់អេកូទេសចរណ៍ ដែលរួមនៅខេត្តក្រចេះ, មណ្ឌលគិរី, រតនគិរី និងខេត្តស្ទឹងត្រែង មានអ្នកទេសចរជាតិជិង៥ម៉ឺននាក់ និងអន្តរជាតិចំនួនជាង៥០០នាក់។

រីឯ តំបន់បាត់ដំបង មានរួមបញ្ចូលខេត្តបន្ទាយមានជ័យ, បាត់ដំបង, ប៉ៃលិន និងខេត្តពោធិសាត់ មានអ្នកទេសចរជាតិជាង៤,១ម៉ឺននាក់ និងអន្តរជាតិជាង៥០០នាក់។ ដោយឡែក សម្រាប់តំបន់ផ្សេង ត្រូវបានបូកបញ្ចូលខេត្តកំពង់ចាម, កំពង់ឆ្នាំង, កំពង់ស្ពឺ, កណ្តាល, ព្រៃវែង, ស្វាយរៀង, តាកែវ និងខេត្តត្បូងឃ្មុំ មានអ្នកទេសចរជាតិជាង៨៦ម៉ឺននាក់ និងអន្តរជាតិ១,៥ពាននាក់ផងដែរ៕