ភ្នំពេញ៖ កម្ពុជា-ហុងកុង បានចុះអនុស្សរណៈនៃការយោគយល់គ្នា(MOU) ចំនួន២ ដើម្បីបង្កើតនូវយន្តការជំរុញការវិនិយោគ និងធុរកិច្ចបន្ថែមទៀតរវាងភាគីទាំងពីរ។ ជាមួយគ្នានេះ សម្តេចធិបតី ហ៊ុន ម៉ាណែត បានលើកឡើងថា ការចុះអនុស្សរណៈនៃការយោគយល់គ្នា រវាងទីភ្នាក់ងារមួយចំនួនរបស់តំបន់រដ្ឋបាលពិសេសហុងកុង ជាមួយក្រុមប្រឹក្សាអភិវឌ្ឍន៍កម្ពុជា នឹងពង្រឹងទំនាក់ទំនងរវាងកម្ពុជា-ចិនកាន់តែរឹងមាំបន្ថែមទៀត។

ការចុះ MOU ចំនួន២ រវាងកម្ពុជា និងហុងកុង នាថ្ងៃទី៣១ ខែកក្កដា ឆ្នាំ២០២៤នេះ រួមមាន៖ អនុស្សរណៈនៃការយោគយល់គ្នា (MOU) ស្តីពីកិច្ចសហប្រតិបត្តិការរវាងវិនិយោគហុងកុងនៃតំបន់រដ្ឋបាលពិសេសហុងកុងនៃសាធារណៈរដ្ឋប្រជាមានិតចិន និងក្រុមប្រឹក្សាអភិវឌ្ឍន៍កម្ពុជា (CDC) និងអនុស្សរណៈនៃការយោគយល់គ្នា (MOU) រវាងក្រុមប្រឹក្សាអភិវឌ្ឍន៍ពាណិជ្ជកម្មហុងកុង និងក្រុមប្រឹក្សាអភិវឌ្ឍន៍កម្ពុជា។ ការចុះ MOU នេះ ធ្វើឡើងរវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន និងក្រុមប្រឹក្សាអភិវឌ្ឍន៍ពាណិជ្ជកម្មហុងកុង។

តាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី៣១ កក្កដា ឯកឧត្តម John KC LEE ប្រធានប្រតិបត្តិនៃតំបន់រដ្ឋបាលពិសេសហុងកុង បានឱ្យដឹងថា គោលបំណងនៃដំណើរទស្សនកិច្ចមកកម្ពុជា គឺដើម្បីពង្រឹង និងពង្រីកចំណងទំនាក់ទំនងរវាងតំបន់រដ្ឋបាលពិសេសហុងកុងជាមួយកម្ពុជា ជាពិសេសគឺក្នុងវិស័យធុរកិច្ច ការវិនិយោគ និងការតភ្ជាប់រវាងប្រជាជន និងប្រជាជន៕