ភ្នំពេញ៖ អាជ្ញាធរ បានឃាត់ខ្លួនបុរសម្នាក់ដែលជាមេខ្លោងឆបោកប្រាក់ ក្រោមរូបភាពលក់ទំនិញតាមអនឡាញ។ ការឃាត់ខ្លួនកាលពីថ្ងៃទី១៦ ខែកក្កដា ឆ្នាំ២០២៤នេះ ធ្វើឡើងក្រោមកិច្ចសហការរបស់នាយកដ្ឋានប្រឆាំងបទល្មើសបច្ចេកវិទ្យា និងអធិការដ្ឋាននគរបាលខណ្ឌសែនសុខ នៃស្នងការដ្ឋាននគរបាលរាជធានីភ្នំពេញ ក្រោយទទួលបានពាក្យបណ្តឹងពីជនរងគ្រោះជាច្រើននាក់។

ជនសង្ស័យដែលបានឃាត់ខ្លួន សារភាពថាខ្លួនពិតជាបានប្រព្រឹត្តអំពើការឆបោកប្រាក់ ក្រោមរូបភាពលក់ភេសជ្ជៈ និងស្រាបៀរ បោះដុំតាមអនឡាញពិតមែន ដោយរូបជនឆបោកនោះ បញ្ជាក់យ៉ាងដូច្នេះថា៖«ខ្ញុំបានបង្កើតគណនីហ្វេសប៊ុកក្លែងក្លាយប្រើឈ្មោះលក់ទំនិញបោះដុំ។ បន្ទាប់ពីជនរងគ្រោះជាច្រើននាក់ បញ្ជាទិញទំនិញ ខ្ញុំបានទំនាក់ទំនងបន្តទៅកាន់ដេប៉ូបោះដុំដទៃទៀតរួចកក់លុយមួយចំនួន ដើម្បីឱ្យខាងដេប៉ូបោះដុំដឹកទំនិញទៅទីតាំងតាមដែលជនរងគ្រោះប្រាប់ ហើយថតរូបភាពទំនិញដែលបានដាក់លើឡានផ្ញើមកឱ្យខ្ញុំ រួចខ្ញុំក៏ផ្ញើបន្ដទៅជនរងគ្រោះក្នុងគោលបំណងឱ្យជនរងគ្រោះទុកចិត្ត។ នៅពេលជនរងគ្រោះផ្ញើប្រាក់មកហើយ ខ្ញុំក៏បានបិទទូរសព្ទ និងប្លុក(Block) លេខរបស់ជនរងគ្រោះ រីឯម្ចាស់ដេប៉ូក៏មិនបានទទួលលុយហើយក៏បានយកទំនិញទៅដេប៉ូខ្លួនវិញ»។

តាមការចុះផ្សាយរបស់នាយកដ្ឋានប្រឆាំងបទល្មើសបច្ចេកវិទ្យា នាថ្ងៃទី១៩ កក្កដា បច្ចុប្បន្នជនសង្ស័យខាងលើ ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់នីតិវិធីបន្ត។ នាយកដ្ឋានប្រឆាំងបទល្មើសបច្ចេកវិទ្យា អំពាវនាវដល់សាធារណជន ពិសេសអ្នកប្រើប្រាស់បណ្តាញទំនាក់ទំនងសង្គមដែលចូលចិត្តទិញទំនិញតាមអនឡាញ ត្រូវវិភាគអោយបានច្បាស់លាស់លើគណនីបណ្តាញទំនាក់ទំនងសង្គមនានា ដែលផ្សព្វផ្សាយលក់ផលិតផល មុននឹងសម្រេចចិត្តទិញផលិតផលនោះតាមអនឡាញ៕